اورماڑہ: دریاوردانی سر ءَ پاکستانی پوج ءِ زوراکی، مھلوک ءِ زھرشانی

مروچی یکشمبے ءِ روچ ءَ بلوچستان ءِ تیاب دپی دمگ گوادر ءِ ھنکین اورماڑہ ءَ پاکستانی لشکری نیوی کارمنداں دریا وردانی سر ءَ زوراکی کتگ –

وئیل ءَ پد مزنیں کچے ءَ دمگی مردم زالبولانی ھواری ءَ جناح نیول بیس ءِ مزنیں گیٹ ءِ دپ ءَ مچ بوتگ انت ءُ آھاں زھرشانی بندات کتگ –

دریاوردانی رِد ءَ نیوی ءِ کارمندانی لٹ شاپی ءَ وحید ٹاپی نامیں دریا وردے زدگ بوتگ ءُ نیوی کارمنداں زدگ بوتگیں مردم وتی گاڑی ءَ کتگ نادراھجاہ ءَ نہ بُرتگ بلکنہ ھمدا دگ ءِ کش ءَ اُشتاتگ انت –

آھانی رِد ءَ زدگ بوتگیں ماھیگیر ءِ ھچ وڈیں الاج کنگ بوگ ءَ نہ انت –

دومی نیمگ ءَ مزنیں کچے ءَ دریا ورد ءُ زالبول جناح نیول بیس ءِ مزنیں گیٹ ءِ دپ ءَ یکجاہ بوتگ ءُ انساپ ءِ لوٹگے ھاتر ءَ زھرشانی بندات کتگ –

درنگاز کنوکانی رِد ءَ چار دریاورد نیوی کارمنداں آوار جتگ ءُ گون وت برتگ انت –

دریاوردانی رِد ءَ زِر ءِ تہ ءَ ھما جاہ کہ نیوی ءَ داتگ ھما جاہ ءَ مارا پنچ روچ انت کہ ماھیگ گرگ انت بلے مروچی اناگت ءَ نیوی ءِ کارمند اتکگ ءُ آھانی سر ءَ لٹ شاپی ءِ کتگ –

درنگاز کنوکانی گوشگ ات کہ دمگی مردمانی گوم ءَ پوج ھما وڈ کنگ ءَ انت کہ زالم ءُ ایردستانی میان ءَ بیت آ دمگی مردمانی گوم ءَ وتی رویش ءَ بدل بہ کن انت –