توتک: یازدہ سالاں بیگواھیں منی برات دیم ءَ آرگ بہ بنت ءُ یل کنگ بہ بنت – اشرف قلندرانی

بلوچستان ءِ دمگ ھزدار توتک ءَ یازدہ سال ساری زورانسری آوار جنگ بوتگیں فدا احمد ءُ ضیاء اللہ ءِ برات اشرف قلندرانی مروچی بلوچستان ءِ بنجاھی شھر شال ءَ وائس فار بلوچ مسنگ پرسنز ءِ بنجل ءَ اتکگ ءُ بازیں سالاں بیگواھیں وتی براتانی یل کنگ ءِ لوٹ کتگ –

اشرف قلندرانی ءِ رِد ءَ آئی ءِ یک براتے فدا احمد سال دوھزار یازدہ ءِ فروری ءِ ماہ ءَ پوج ءَ چہ توتک ءَ لشکر کشی ءِ میان ءَ آوار جتگ ءُ بیگواہ کتگ وھدیکہ ھما سال ءِ نومبر ءِ ماہ ءَ دومی برات ضیاء اللہ چہ ھزدار ءَ باغبانہ ءَ آر سی ڈی شھدگ ءِ سر ءَ آوار جتگ ءُ گوں وت برتگ کہ ھما انت گار ءُ بیگواہ انت –

اشرف قلندرانی ءَ سرکار، ھمے ادارہ ءُ انسانی ھکانی گلاں گوں دزبندی کتگ کہ آ آئی ءِ براتانی یل کنگ ءَ وتی کرد ءَ پیلو بہ کن انت –

اشرف قلندرانی ءَ گوشتگ کہ براتانی زورانسری آوار جنی ءَ پد آئی ءِ کماش وتی چکانی ودار کنان ءَ بیران بوتگ نوں آئی ءِ مات ھم وش وش نہ انت – اگاں منی براتانی سر ءَ ھر وڑیں کتکاری ءِ الزام ءِ ھست گڑا ریاست آھاں آمیدگس ءَ بیار ایت وتی بے میاری ءِ موہ بہ دنت اش –

زانگ بہ بیت سال دوھزار یانزدہ ءَ ھزدار ءِ دمگ توتک ءَ مزنیں کچے ءَ لشکر کشی ءِ بندات کنگ بوتگ ءُ آ لشکر کشی ءِ میان ءَ پوج ءَ گِس گس پٹ ءُ پول کتگ انت ئِے قلندرانی ٹک ءِ بازیں مردمے زورانسری آوار جتگ ءُ گوں وت برتگ انت کہ آھانی تہ ءَ لھتے مردم یل کنگ بوتگ انت بلے تنی وھدی سینزدہ مردم انگت گار ءُ بیگواہ انت –

لشکر کشی ءِ سَے سال ءَ پد بزاں سال دوھزار ءُ چاردہ ءَ ھمے دمگ ءَ یکجاھیں کبرے ءَ کساس یکسد ءُ شست ءُ نُھ مردمانی ھڈ ءُ کانپول در اتکگ انت – میان استمانی انسانی ھکانی گلانی رِپورٹ ءِ رِد ءَ اے جون بلوچستان ءَ پوج ءِ دست ءَ آوار جنگ بوتگیں بیگواھیں مردمانی بوتگ انت –