ماتویں چاگرد – سیپ بلوچ

ماتویں چاگرد

نبشتہ کار: سیپ بلوچ

دومی بھر

دی بلوچستان پوسٹ

روچ بڈگی ءِ سیمسران اَت کہ سمل ءِ کماش ءَ گْوک ءُ دلْوت کاه ءُ بوچ کُت اَنت جنزاں بوت پہ میتگ ءَ ، چوناها کہ هَمک مَگرب ءَ سمل ءِ کماش اتکگ پہ سمل ءَ ناهانی وهد بیتگ ناه ءُ پوسگ پپک ءُ کوسرکانی وهد ءَ ماک ءُ پرماش ءِ گون بوتگ مرچی کہ چہ ڈگاراں اتکگ ات هچ چیز ئِے گوں نیست اَت سمل چہ وانگجاه ءَ ساهت ءِ پنچ ءَ واتر اِتگ ات ، کمیں ساهت ودار ءَ رند وتی وانگی کاراں گوں گلائیش اَت-

سمل ءِ کماش ءِ ڈن ءَ تَگرد ءِ سر ءَ نشتگ اَت سمل ءِ ماتو ءَ چاه ءُ آپ کتگ اَت کُپّ ءُ نُرنڈگ ءَ اَت ، ءُ دْرائینت ئِے جن ئے ماهو سمل کجا اِنت ، گندگ نہ بیت؟ ماهو لوگ ءَ نان پچگ ءَ اَت ماهو ءَ درائینت ءُ گْوشت سمل پُشت ءِ لوگ ءَ بوتگ نزاناں چے ءَ در نہ اِت شرمندگ اِنت بلکیں دیم ءِ سیاه کتگ جاگهے بوت کنت-

سمل ءِ کماش ءَ بد بُرت پاد اتک لَٹ ءِ زرت راهی بوت پہ پُشتی کُڈک ءَ همے کہ کُڈک ءِ دپ ءَ اتک سمل ءَ دیست ءُ دْرائینت ابا تو اتکگ ئے تنگی مهلہ اِنت من پمیشکا وتی وانگی کاراں گوں گلائیش آں سماه نہ کپتگ ، داں همدا کماش ءَ بد بُرت مرگ برات ترا گوں تئی وانگ ءَ چار ءُ پنچ لَٹّے سمل ءَ را جت بَڈّ ءَ سمل زار زار ءَ گریوگ ءَ لگ اِت داں کماش دَر اینت چہ لوگ ءَ کُپّان ءُ نُرنڈان بوت دیم پہ تَگرد ءَ شُت ءُ نشت ، سمل ءِ ماتو ماهو ءَ توار پِر جت کہ چے اِنت سمل ءَگریوگ ءَ اِنت کماش ءَ بَد بَرگی ءَ گوں دْراهینت ءُ گْوشت تو شر زان ئے کہ سمل گریوگ ءَ اِنت وجہ چے اِنت بلے تو مانجائیں جنینے ئِے گیشیں جست مکن لٹ انگت منی دستا انت تئی جان ءَ اوں ژند کن آں ، بلے جنیں منی هبر ءَ شر اشکن باندا سمل ءَ وانگ رؤگ ءَ مئیل وتی کرا بدارے بِل ئے تئی چلوبگاں کنت گوں ، دانکہ منی برات زتک چہ مسکت ءَ کیت هبر بندی ءَ ئے کن آں سیر دیانے وت شر بیت تچ ءُ تاگے کمتر بنت-

سمل ءِ ماتو ءَ درائینت کہ اے و وشیں هبرے تئی برات زتک شریں بچکے کار ءُ روزگار ءَ اِنت ڈن ءَ اِنت پہ سمل ءَ چدو شرتریں سانگ اتک نہ کنت-

روان اِنت —

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔