ریاستی شوربندی بلوچ راج ءِ تہ ءَ گیشتر زھری پیداک کنگ ءَ انت – ماما قدیر بلوچ

بلوچستان ءِ بنجاھی شھر شال ءَ بلوچ راجدوستیں باسکانی پاکستانی پوج ءِ دست ءَ زورانسری آوار جنی ءِ بگیری ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُھپسد ءُ ھپتاد روچ سرجم بوتگ انت – مروچی چہ پنجگور ءَ مسلم لیگ ن ءِ دمگی سرکماش قاضی رضا علی بلوچ، راشد بلوچ، یونس بلوچ ءُ ریاض بلوچ ءَ بنجل ءَ اتکگ ءُ دلپدردی درشان اتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ انسانی ھکانی لگتمالی ءِ بگیری ءَ بلوچ پرزند راجی جھد ءِ ھاتر ءَ دیمھونی ء پھمگ انت ءُ تمردی ءَ گوں ریاستی زوراکیانی دیمپانی ءَ کنگ ءَ انت – بلوچانی زورانسری آوار جنی ءِ جیڑہ ءِ واک راستی پاکستانی پوج ءُ ھمے ادارھانی گور انت کہ اشی ءَ گیش گیوار کت کن انت وھدیکہ اے وتگڑیں جمہوری سرکار بس ربڑ اسٹیمپ انت، پارلیمانی اسمبلی ءُ گچین کرتگیں وتگڑیں نمائندگاں بلوچ راجی جیڑو ءِ درگت ءَ بس آھاں ھمے ھک ھست انت کہ پوج ءَ چیریں ادرھانی پلامرز بہ بنت، ءُ پاکستان ءِ برزی تبک ءِ آمیدگس ءِ لگام ھم ھمیشانی دست انت –

آئی ءَ گوشتگ کہ بلوچستان ءَ امن ءُ ایمنی ءُ زورانسری آوار جنگ بوتگیں بلوچ پرزندانی ارزی ءَ سپریم کورٹ ءِ کاراں چہ اے گپ پدر انت کہ اے جیڑو ءِ گیشگیواری پوج ءِ گور انت گڈا زاھریں گپ یے کہ پوج گڈا پوجی گیشگیواری ءِ راھے درگیجیت –

آئی ءَ گوشتگ کہ چین ءُ سعودیہ ءَ انسانی ھکانی لگتمالی ءِ بگیری ءَ میان استمانی دیم ءَ اوشتگی انت اگاں آ پاکستان ءَ پوجی یا مالی کمک کن انت گڈا پاکستان آھانی کمکاں بلوچستان ءَ کارمرز کنت کہ چریشی ءَ ناکہ تھنا بلوچ آھانی سر ءَ زھر بیت بلکیں انسانی ھکانی لگتمالی ءِ جیڑہ ءَ میان استمان ءِ زور ھم گیش بیت اںت – بلوچ راج ءَزورانسری آوار جنی ءِ جیڑھے گیشگیوار ءِ ھاتر ءَ وڈ وڈا جھد کتگ بلے پاکستانی ریاست ءِ پالیسی اسٹبلشمنٹ ءِ روایتی استعماری سوچ ءَ زاھر کنت –

وائس فار بلوچ مسنگ پرسنز ءِ رِد ءَ مستونگ ءِ دمگ کانک ءَ پنچ سال ساری پاکستانی پوج ءِ دست ءَ زورانسری آوار جنگ بوتگیں محمد رحیم ء محمد حسین یل کنگ بوتگ –