شال: بیگواھیں بلوچانی ھاتر ءَ وائس فار بلوچ مسنگ پرسنز ءِ یکشلیں زھرشانی برجاہ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ نیمگ ءَ زورانسری آوار جنیانی ھلاپ ءَ پریس کلب ءِ دیم ءَ یکشلیں زھرشانی ءَ 4758 روچ سرجم بیتگ-

ھمے وھد ءَ این ڈی پی ءِ رھشون غنی بلوچ، نزر بلوچ، سلمان بلوچ ءُ دگہ مردماں اتکگ ءُ ھمدردی درشان کتگ-

گل ءِ کسان کمک سرکماش ماما قدیر بلوچ ءَ گوشتگ انسانی راجدپتر اے چیز ءِ گواہ اِنت دنیا ءِ کجام ھم جاہ ءَ زلم ءُ زوراکی ءِ ھلاپ ءَ چست بیتگیں توار کشت ءُ کوشانی زوراں دارگ نہ بیتگ اَنت نانکہ ھلاس بیتگ اَنت-

ماما قدیر بلوچ ءَ گشتگ کہ بلوچاں پد نی پشتون دمگ ءُ ھرنائی ءَ ھم بازیں ماھاں لشکر کشی برجاہ اَنت پشتونانی زورانسری آوارجنی ءُ لوگاں مانداتگ اَنت –

آئی ءَ گوشتگ ات کہ بلوچ پشتون یکجاہ بہ بنت ءُ زورانسری آوار جنیانی ھلاپ ءَ توار چست بہ کن اَنت-

وائس فار بلوچ مسنگ پرسنز ءِ رد ءَ ھمے ماہ ءَ گریشہ ھزدار ءَ آوار جنگ بیتگیں ڈاکٹر کریم بخش ءُ ھمے سال ءِ بیست ءُ شش اگست ءَ اردو بازار کراچی ءَ آوار جنگ بیتگیں لالا فھیم بلوچ ءِ کیس بلوچستان ءِ سرکار ءَ سر کرتگ اَنت ءُ چہ بلوچستان ءِ سرکار ءَ ھردوکانی یل کنگ ءِ دزبندی کرتگ-