نیٹو ءِ باسکیں ملک البانیہ ءَ جولائی ءَ بیتگیں سائبر اُرش ءِ درگت ءَ تھران ءِ سرءَ بھتام جنانءَ چارشمبے ءِ روچ ءَ درستیں ایرانی سفارت کاراں سفارتی کارمنداں 24 ساھتانی تہءَ ملک یل کنگ ءِ پرمان داتگ۔
البانیہ ءِ سر وزیر ایدی راما ءَ یک تامری درشان ئے تہءَ گُشتگ، “سرکار ءَ اسلامی جمہوریہ ایران ءَ گوں سفارتی سیادی ھلاس کنگ پیسلہ کُتگ۔”
راما ءَ گُشتگ کہ، “اے ترندیں گامگیج سائبر اُرش ءِ سنگینی ءُ ھترناکی ءِ درگت ءَ جوانیں پیسلہ اِنت۔ ایرانی اے اُرش ءَ چہ سرکاری کاراں اوشت آماچ کنگ، ڈیجیٹل نظام ءَ ھلاس کنگ، ریاستی ریکارڈزاں ھیک کنگ، سرکاری انٹرانیٹ الیکٹرانک رھوتانی دُزی کنگ ءُ ملک ءِ تہءَ نگیگیں ءُ بے باوری ءِ جاور ودی بئیگ ءِ تُرس ودی بیتگ اَت۔”
چدو پیسر البانوی سر وزیر ایدی راما ءَ 15جولائی ءَ بیتگیں سائبر اُرش ءِ پَٹ ءُ پول ءَ پد ایرانی سفارت کاراں سفارت جاہ ءِ کارمنداں 24 ساھتانی تہءَ ملک ءَ یل کنگ ءِ پرمان داتگ اَت۔
ایران ءَ البانیہ ءَ بیتگیں سائبر اُرشانی پُشت ءَ آئی ھواری ءِ بھتام “بے بن ھشت” گُشتگ اَنت۔
ایرانی وزارت خارجہ ءِ نیمگ ءَ شنگ بیتگیں درشان ئے تہءَ گُشگ بیتگ کہ “سفارتی سیادیانی ھلاس کنگ ءِ البانیہ ءِ پیسلہ اپسوزی ءُ تنگ نظری ءِ سرءَ بندوک اِنت۔”
دومی نیمگ ءَ امریکہ ءَ سائبر اُرشانی پُشدرءَ البانیہ ءِ نیمگ ءَ ایران ءِ بگیر ءَ جتگیں بھتامانی سرءَ البانیہ ءِ پیسلہ ساڑءَ اِتگ ءُ گُشتگ کہ آ وتی نیٹو ھم سنتیں ملک ءِ سرءَ بیتگیں سائبر اُرش ءِ پسہ ءَ ایران ءِ بگیر ءَ گیشتر گامگیج زرت کنت۔
برتانیہ ءِ نیشنل سائبرسکیورٹی سینٹر ءَ ھم البانیہ ءِ سرکارءِ بگیر ءَ بیتگیں سائبر اُرشانی پُشدر ءَ ایران سرءَ بھتام جتگ ءُ گُشتگ کہ ایرانی ریاست ءَ بندوکیں کارمند “باوری دروشم ءَ” اے اُرش ءِ زمہ وار اَنت۔
زانگ بہ بیت کہ ایران ءُ البانیہ ءِ نیام ءَ جاور چہ سال 2014 ءَ نگیگ اَنت وھدیکہ تیرانا ءَ ایرانی پناگیریں اپوزیشن ٹولی مجاہدین خلق ءِ کساس 3000 باسکاں باھوٹی داتگ اَت۔