ھب: این ڈی پی ءِ نیمگ ءَ سردار عطاء اللہ مینگل ءِ نمیرانی ءِ اولی سالروچ ءِ درگت ءَ مراگش

سردار عطاءاللہ مینگل مئے استاد ءُ مئے رھشون اِنت، بلوچ راجدپتر بید ءِ نواب خیربخش مری، عطاءاللہ مینگل ءُ اکبر خان بگٹی ءَ ناسرجم انت – ترانکار

گوستگیں روچ ءَ بلوچستان ءِ دمگ ھب ءَ نیشنل ڈیموکریٹک پاٹی ءِ نیمگ ءَ بلوچ راجدوستیں رھشون سردار عطاءاللہ مینگل ءِ یات ءَ مراگشے برجم دارگ بوتگ کہ اود ءَ اے این پی کے ءِ لالا منان، لسبیلہ بار ایسوسی ایشن ءِ غلام رسول انگاریہ، اھوالکار شبیر احمد انگاریہ، بی وائی سی کراچی ءِ عبدالوھاب بلوچ ءُ واجہ حنیف دلمراد ءُ نیشنل ڈیموکریٹک پاٹی ءِ بنجاھی آرگنائزر شاہزیب بلوچ ایڈوکیٹ ءَ وتی ھیال درشان کرتگ انت – مراگش اسٹیج سیکٹری ءِ زمہ داری این ڈی پی ءِ بنجاھی آرگنائزنگ کمیٹی ءِ باسک قندیل بلوچ ءَ گون بوتگ – مراگش ءِ بندات قرآن مجید ءِ وانگ ءُ بلوچستان ءِ شھیدانی یات ءَ دو ملٹ ءَ ھاموشی بوتگ بلوچ راجی سوت ءَ گوں کنگ بوتگ –

این ڈی پی ءِ بنجاھی ڈپٹی آرگنائزر رشید کریم ءَ بندات ءَ تران کُتگ ءُ مھمان وش اتک کرتگ انت –

مراگش ءَ ترانکاراں سردار عطاءاللہ مینگل دروت ندرکتگ ءُ آئی زند ءِ ھر تک ءُ پھناتانی سر ءَ وتی ھیال درشان اتگ انت – آھانی گوشگ ات کہ بلوچ راجدوستیں رھشون سردار عطاء اللہ مینگل بلوچ نشنلزم ءِ درگت ءَ یک کلانیں رھشون ءِ بوتگ، آئی ءَ مدامی وتی ایردستیں راج ءُ بلوچ سرڈگار ءِ ھاتر ءَ راجداری کتگ، سردار عطاء اللہ مینگل ءَ ھوار دگہ راجداریں رھشون کہ نواب اکبر خان، نواب خیربخش مری، باچا خان ولی خان اے درسانی جھد پہ بلوچ ءُ پشتونانی ھاتر ءَ درونت انت آئی ءَ مدامی رھبندانی رد ءَ راجکاری کتگ، سردار عطاء اللہ مینگل یک پھتویں سیاسی ءُ نزریاتے ءِ واھند بوتگ کرن بہ گوز انت ما آھانی جاہ ءَ پُر کت نہ کن ایں، آ یک سیاسی استاد، آئی ءِ ترندیں لیکہ آئی ءِ ھبر دراہ پہ وتی ایردستیں راج ءِ ھاتر ءَ بوتگ انت – آھانی گوشگ ات کہ کسی ءِ وھم گمان ءَ نہ بوتگ کہ وڈھ ءَ رسول بخش مینگل ءِ گِس ءَ ودی بوتگیں عطاء اللہ مینگل ناکہ تھنا پہ بلوچستان ءَ بلکنہ سرجمیں ایشیا ءِ تہ ءَ کلانیں رھشون ءِ زانگ بیت انت – عطاء اللہ مینگل ءِ سیاسی زند ءِ سر ءَ تران کنان ءَ آھانی گوشگ ات کہ آئی ءَ وتی راجکاری ءِ بندات ون یونٹ ءِ دور ءَ کتگ کہ آئی ءِ مول بنگال ءَ ھوار ایندگہ کسانیں راجانی لٹ پُل ھلاس کنگ بوتگ –

ترانکارانی گوشگ ات کہ بلوچستان ءِ تہ ءَ چار ھنچیں مردم انت کہ ھچبر شمشکار نہ بہ انت ھر ھما وھد ءَ بلوچ ءُ بلوچستان ءِ سر ءَ گپ بیت گڑا اود ءَ سردار نواب خیر بخش مری، غوث بخش بزنجو، سردار عطاء اللہ مینگل ءُ نواب اکبر خان بگٹی ءِ نام الم گرگ بیت اِنت – مروچی اے مراگش ءَ ھمے پیام دیگ بیت اے مردم ھچبر شمشکار کنگ نہ بنت – گوستانک بے رھم اِنت اے ناکہ پہ تاکت ءُ ناکہ چہ زر ءُ مال ءَ نبشتہ کنگ بیت اگاں بہ بوتیں گڑا مرچی ضیا الحق، مشرف، ءُ لیاقت علی خان ءِ روچ دارگ بوتگ ات بلے گوستانک مروچی آھانی بدل ءَ ولی خان، باچا خان، عطاءاللہ مینگل، نواب اکبر ءُ خیر بخش مری ءَ یات کنگ بنت –

ترانکارانی گوشگ ات کہ 1973 سیاھیگ ھُشک نہ بوتگ انت کہ بلوچستان ءِ جمھوری سرکار درکانودی ھلاس کنگ بوتگ، عطاءاللہ مینگل ءِ چیردستی ءَ اے جمھوری سرکار ءَ بس دو سالانی تہ ءَ بلوچستان شھدربر جاہ، بولان میڈیکل کالج، بلوچستان بورڈ آف ایجوکیشن ءَ ھوار بے کساس انکلابی کار کتگ بلے چوش کہ وتگڑیں تاکتاں ھمے ترس ات کہ اگاں اے سرکار لھتے سال ءَ انگت بہ چل ایت گڑا بلوچستان دگہ دروشمے ءَ بیت اِنت ءُ بلوچ ءِ مال ءُ مڈی آھانی دست ءَ چہ رو انت – عطاء اللہ مینگل مدامی وتی گپانی سر ءَ اُشتاتگ بے کساس ءَ زوراکی، زھگ ءِ زورانسری آوار جنی پد ھم آ وتی گپانی سر ءَ اشتاتگ – آھانی گوشگ ات کہ لھتے وتگڑیں مردماں وھدیکہ زبان نام ءَ بلوچ راج بھر کنگ ءِ جھد کتگ گڑا عطاء اللہ مینگل ءَ آھانی دیم داشتگ ءُ پدکنزینتگ انت ءُ آ ھمے پیام داتگ انت کہ بلوچ پہ زبان ءِ نام ءَ ھچبر بھر بانگ ءُ کنگ نہ بنت – سردار عطاء اللہ مینگل ھچبر ملکی رسانکدرانی سر ءَ اوست نہ داشتگ پارلیمانی سیاست ءَ چہ دلپروش بوتگ ءُ ھاموش بوتگ – آئی ءَ مدامی گوشتگ کہ دراہ بلوچ ورنایانی دست ءَ انت کہ آھانی منارینگ منی دست ءَ نہ انت –

ترانکارانی گوشگ ات کہ گوستانک وئیلانی سر ءَ نبشتہ کنگ بیت یا ھما مردمانی کرد ءِ سر ءَ گوستانک مدامی دوبر وتر بیت مارا چہ اے پگر ءَ در آھگی انت پرچاکہ کہ عطاء اللہ، اکبرخان ءُ خیر بخش مری ءِ پالور جوڑ بیت کن انت بلے آ مردم دوبر ودی بوت نہ کن اَنت-

سردار عطاءاللہ مینگل ءِ شخصیت ءِ سر ءَ ترانکارانی گوشگ ات کہ آ جوانیں ترانکار ءِ بوتگ ھر ھما وھد ءَ اسٹیج ءِ سر ءَ شتگ گڑا وتی تراناں گوں سرجمیں مھلوک دلگوش کتگ – مارا سردار عطاء اللہ مینگل ءِ درونت پھمگی انت کہ آئی ءَ پہ مئے ھاتر ءَ یل داتگ ءُ شتگ اے جھد پھمگی انت زانگی انت کہ آئی ءِ تہ ءَ مارا وتی پجا آرگ ءِ درونت رس انت اے سرڈگار ءَ گوں مھر کنگ ءِ درونت رس انت –

ترانکارانی گوشگ ات کہ یک سیاسی پاٹی ءِ ریاست ءِ درور ءَ بیت بلوچ ءِ منزل دور انت ما وتی منزل ءَ ھما وھد ءَ سر بہ ایں وھدیکہ عطاء اللہ مینگل، اکبر خان بگٹی ءُ نواب خیربخش مری ءِ پنجاہ سالی جھد ءِ پدرنداں بہ رو ایں بلے بدکسمتی ءَ بہ چار مئے گور ءَ اے مردمانی بائیو گرافی نیست اِنت کہ مئے راجی مڈی انت – عطاء اللہ مینگل ءَ گوشتگ کہ وھدیکہ منی ھک کسے ءَ وتی کِیسگ ءَ کرت من آئی ءِ کیسگ ءَ دِراں اگاں آئی ءَ لاپ ءَ کرت چہ لاپ ءِ در کناں – مروچی بلوچ ءِ لٹ ءُ پُل بوگ ءَ انت زورانسری اوار جنی سک باز بوگ ءَ انت – چیزے روچ ساری اردو بازار ءَ کتاب بھا کنوک ءِ آوار جنگ بوتگ – مروچی ریکوڈک ءَ بلوچستان ءِ مال ءُ مڈی پُلگ بوگ ءَ انت ءُ لینڈ ایکیوریشن ایکٹ ءِ رِد ءَ بلوچانی زمین پچ گرگ بوگ ءَ انت اے درسیں جیڑہ ھما وھد ءَ گیشگیوار کنگ بنت ما اے مردمانی پد رنداں بہ رو ایں –

ترانکاراں دلگوش گوں ورنایاں کتگ گوشتگ کہ مارا وتی میان ءِ درسیں بگیری ایراد ھلاس کنگی انت ھما ایراد کہ زد ءُ کُنت انا ءِ سر ءَ انت اے درسیں ایراد ھنچوش ھلاس کنگی انت ھنچوش کہ پہ بلوچ ءِ کاز بلوچ ءِ لوٹانی ھاتر ءَ بازیں مردماں وتی ایراد ھلاس کتگ انت –

ترانکاراں سردار عطاءاللہ مینگل ءِ سیاسی ءُ املی جھد ءِ ھمراھی ءَ بلوچ راجدپتر ءِ سر ءَ ھم تران کتگ کہ آئی ءِ تہ ءَ دود ربیدگ، زبان، لٹریچر، بلوچ ءِ روایت ءُ میان استمانی بدلی پژدر ءَ بلوچستان ءِ اسرمند بوھگ ءَ پد ھمے بدلیانی دیمپانی ھاتر ءَ سیاسی ءُ المی ءُ پھتویں گامگیجی ءِ سر ءَ زور دیگ بوتگ –

مراگش ءِ گڈسر ءَ این ڈی پی ءِ بنجاھی آرگنائزر شاہزیب بلوچ ایڈوکیٹ ءَ درسیں مردمانی منت گپتگ ءُ مھماناں نیشنل ڈیموکریٹک پاٹی ءِ بنجاھی آرگن راج سوگات کرتگ انت –