شال نندانک ءَ کھولانی تبیت ناجوڑ بوتگ اَنت

بیگواھیں مردمانی کھول ریڈزون نندانک برجاھیں، نندانک ءَ ھوار زھرشانی کنوکانی تبیت ناجوڑ اَنت موسم سبب ءَ ناساز بوتگ اَنت-

گیشیں ھالانی رِد ءَ شال گورنر گس دیم ءَ برجاھیں بلوچ بیگواھیں مردمانی کھول ءِ زھرشانی ءَ نندانک ءَ مروچی 43 روچ سرجم بوتگ، نندانک ءَ نشتگیں مردم باندا دگ ءَ بند کن اَنت-

نندانک ءَ نشتگیں مردماں شکایت کتگ کہ یکشلہ 43 روچ ءُ شپ موسم تُرندی ءُ یک ھپتگے ءَ تُرندیں ھواراں چہ ڈن ءَ تمبواں نندانک ءَ ساڑی ئیں کھولانی تبیت ناجوڑ بوان اَنت-

نندانک ءَ نشتگیں مردماں سوشل میڈیا یک جارے شنگ کتگ ءُ گْوشتگ کہ بیگواھیں مردمانی کھول وتی لوٹانی ھک ءَ سُھب دہ ءَ جی پی او چوک ءُ سرینا چوک سر ءَ نندانک جن اَنت شھدگ ءَ سرجمیں روگ ءُ آھگی ھاتر ءَ بند کن ایں ءُ کجام اشتاپی جاور دگ ءَ پچ نہ کن ایں-

نندانک ءَ نشتگیں مردماں گوں دزبندی کتگ کہ آ باندا زھرشانی وھد ءَ یک دگہ راھے بہ شوھاز اَنت اگاں باندا زھرشانی ءَ چہ لَس شھریاں دلسیاھی رس اِیت گُڑا زمہ وار ھکومت بیت کہ آ وتی شھریاں گوشدارگ آیانی ھکیں لوٹانی سر ءَ چست ءَ ایر ءَ بے سوب بوتگ-

نندانک ءَ نشتگیں کھولانی گْوشگ اِنت کہ یک بلاھیں لاچاری ءَ دگ بند کتگ زھرشانی ءَ جُنزینگ ءَ ایں پرچاکہ ھکومت اے لوٹانی سر ءَ چست ءُ ایراں سنجیدگ گندگ بوگ ءَ نہ اِنت-

آیاں دیمتر ءَ گْوشتگ کہ پیسرگیں وھد ءَ دگ بندگ کنگ ءَ ھم کھولاں گپ ءُ تران ءُ جیڑہ ءِ گیش گیواری ءِ باور کنائینتگ ءُ مسام کنگ بوتگ بلے سول انتزامیہ ءِ زمہ وار وتی مسام ءَ پُشت کنز بوتگ اَنت ءُ پد ءَ ھچ گامگیج زورگ نہ بوتگ-