کیچ ءِ ھند زامُران ءَ ایف ڈبلیو او ءِ گاڑی ءِ سر ءَ اُرش ءِ زِمہ واری ءَ منّ اِیں، بی ایل ایف

بلوچستان لبریشن فرنٹ ءَ کیچ ءِ ھند زامران، اَبدوھی ءُ آسکان ءِ مْیان ءَ نِھنگ کَور ءَ پوج ءِ کاربوجانی شِرکت پرنٹئیرورکس آرگنائزیشن( ایف ڈبلیو او) ءِ گاڑی ءِ سر ءَ اُرش ءِ زِمہ واری منّ اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشان ءِ تہ ءَ گْوشتگ کہ 30 اگست ءَ روچ سے شمبے ءِ ادار سے ءُ نیم ءَ مئے سرمچاراں کیچ ءِ ھند زامُران، اَبدوھی ءُ آسکان ءِ مْیان ءَ نِھنگ کَور ءَ پوج ءِ کاربوجانی شِرکت پرنٹئیرورکس آرگنائزیشن( ایف ڈبلیو او) ءِ گاڑی ءِ سر ءَ گوں مزنیں سِلاھاں اُرش کُرتگ، اُرش ھمے وھد ءَ کنگ بوتگ کہ وھدے ایف ڈبلیو او ءِ ٹِیکدار (ٹھیکدار ) گولڈ سمتھ لائن ءَ ٹٹ (باڑ) ءِ چار ءُ تپاس ءَ چہ پوج ءِ بُنجل ءَ درکپتگ۔ اُرش ءِ آسر ءَ گاڑی ءَ سواریں پنچ کارندہ مُرتگ ءُ یکّے ٹپّی بوتگ۔

جارکشّ میجر گْوھرام بلوچ ءَ دیمتِر ءَ گْوشتگ کہ پاکستانی پوج ءِ کاربوجانی شِرکت پرنٹئیرورکس آرگنائزیشن( ایف ڈبلیو او)  زُِورگِپتیں بلوچستان ءَ پاکستانی پوج ءِ کْوزہ ءَ مُھکم کنگ ءِ درگت ءَ کُمکّ کنگ ءَ اِنت، ایف ڈبلیو او پاکستانی پوج ءِ ھاتِر ءَ دگ، پُل ءُ اے دِگہ کاربوجیں کاراں پیلو ءُ دیمروئی دَیَگ ءَ اِنت۔ پاکستانی پوج ھندی مردُم ءُ ٹِیکداراں وتی شوربندیانی واستا کارمرز کنگ ءَ اِنت دانکہ آ پوج ءِ ترّ ءُ گرد ءِ ھاتِر ءَ آسراتی ودی بِہ کنت۔ ما یکرندے پد ءَ کڈّن کن اِیں کہ ھندی ٹِیکدار (ٹھیکدار) ریاست ءِ کُمکّاری ءُ چہ لشکر ءِ نزّیکی ءَ پھریز بِہ کن اَنت، ھمے وڑ ءَ اے پوجی کاربوجیں شوربندیانی بھر مہ بَہ اَنت۔

میجر گْوھرام بلوچ ءَ وتی درشان ءِ دیمتِر ءَ گْوشتگ کہ ما ھندی ڈرائیوراں ھم کڈّن کن اِیں کہ آ پاکستانی پوج ءَ را چہ راشن ءِ پُجّارینگ ءَ وتی دست ءَ بِہ کشّ اَنت، چی ءَ کہ مئے گْور ءَ اے تیوگیں ڈرائیورانی اھوال ھست اَنت، اگاں نا آ وتی نُکس ءُ تاوان ءِ زِمہ وار وت اَنت۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی درشان ءِ گُڈّسر ءَ شیوار کنان ءَ گْوشتگ کہ دُژمِنیں پوج ءُ آئی کُمکّارانی سر ءَ مئے اے اُرش دانکہ زیردستیں بلوچستان ءِ آجوئی ءَ گوں تْرندی ءَ برجاہ بَہ اَنت-