فہیم بلوچ ءِ آوار جنی ءَ سندھ پولیس ءِ دست مان انت – کھول

کراچی پریس کلب ءَ بیگواھیں شنگ کار ءُ اھوالکار فہیم بلوچ ءِ کھول ، ہیومن رائٹس کمیشن آف پاکستان ءِ سرکماش اسد اقبال بٹ، قاضی حضر ءُ بلوچ یکجھتی کمیٹی کراچی ءِ آرگنائزر آمنہ بلوچ ءَ اھوالکاراں گوں تران کنان ءَ فہیم بلوچ ءِ آوارجنی ءِ بارو ءَ سرجمیں ھال داتگ انت –

اھوالکاراں گوں تران کنان ءَ آھانی گوشگ ات کہ بیست ءُ پنچ سالی ئیں فہیم بلوچ بنکی ءَ بلوچستان ءِ دمگ پنجگور وشبود ءَ نشتگ – آ الم ءُ ادب شنگار کارگس ءِ منیجر انت وھدیکہ صدائے بلوچستان ڈاٹ کام ءُ سَے ماھی گدان پنجگور ءِ ایڈیٹر انت – آئی ءَ بازین وھدے بوتگ کہ کراچی ءِ دمگ نیول کالونی ءَ جاھمنند بوتگ – سنگت، سیاد ءُ وارس آئی ءَ لالا فہیم ءِ نام ءَ توار پر جن انت –

آھانی گوشگ ات کہ بیست ءُ شش اگست ءَ بیگاھے ادار ھشت ءُ نیم ءَ کراچی ءِ دمگ اردو بازار ءَ لس پوشاک گور ایں سَے مردم ءُ سَے کمانڈو بُک مال ءَ سیمی فلور ءَ بزاں لالا فہیم ءِ کتاب ءِ دکان ءَ الم ءُ ادب پبلشر اینڈ بک سیلرز ءَ اتکگ انت ، چم دیستیں شاھدانی گوشگ انت آھاں چہ لالا فہیم ءَ کتاب ءِ جست کُتگ ءُ پدا واتر شُتگ انت بلے پدا سھتے ءَ پد واتر اتکگ انت آئی ءَ گوشتگے کہ گوں ما بیا گڈا گوں وت برتگے ءُ جھل ءَ پولیس ءِ گاڑی اوشتوک بوتگ آ پولیس گاڑی ءَ سوارت کتگ کہ ھما انت گار انت کس نہ زانت کہ کجا ایں –

آھانی گوشگ ات کہ اے وئیل ءِ سی سی ٹی وی تامر ھم دیم ءَ اتکگ کہ آئی ءِ تہ ءَ گندگ بیت کہ پولیس ءُ لس پوشاک گوریں مردم آئی ءَ گون وت برگ انت – اے تامر ءَ اے گپ پدر انت کہ لالا فہیم ءِ آوار جنی ءَ سندھ پولیس ءِ دست تچکی ءَ مان انت –

پریس کانفرنس ءَ اھوالکاراں گوں تران کنان ءَ آھانی گوشگ ات کہ اے وئیل ءَ چار روچ ءَ پد بزاں بیست ءُ نھ اگست ءَ لالا فہیم ءِ آوار جنی ءِ ارزی پریڈی پولیس تانہ ءَ نبشتہ کنگ بوتگ کہ فہیم بلوچ ءِ سیاد ام حبیبہ ایڈوکیٹ ءَ نبشتہ کنائینتگ –

آھانی گوشگ ات کہ لالا فہیم ءَ وتی لھتے سنگتانی ھمراھی ءَ سال دوھزار شانزدہ ءَ الم ءُ ادب سیلرز ءِ نام ءَ کتاب بھا کنگ بندات کتگ ءُ لھتے سال ساری آئی ءَ شنگکاری ءِ کار ھم بندات کتگ بوتگ – اے میان ءَ آئی ءَ وتی ادارہ ءِ نیمگ ءَ سد ءَ گیش المی ءُ ادبی کتاب شنگ کتگ انت –
الم ءُ ادب گیشتر ادبی کتاب شنگ کنت کہ آھانی تہ ءَ نود ءَ گیش کتاب اردو ءَ انت ءُ لھتے بلوچی ءِ ھم ھوار انت – اے کتاب بازار ءَ ھم دست کپ انت اشانی تہ ءَ ھچ چشیں مواد ءِ نیست کہ آ درکانودی ءُ ریاست ءِ بگیری ءَ بہ بنت –

آھانی گوشگ ات کہ فہیم ءِ یل کنائینگے ھاتر ءَ ما سندھ ہائی کورٹ ءَ ھم شُتگ ایں کہ آئی ءِ پیشی ھم بوگ ءَ انت مارا امیت انت کہ چہ آمیدگس ءَ مارا انساپ رسیت –