وائس فار بلوچ مسنگ پرسنز ءِ رھشون سمی دین بلوچ ءَ وتی درشان ءِ تہ ءَ گوشتگ کہ ما ماھے ءَ گورنر کارگس ءِ دیم ءَ نشتگ انت ما دلگوش دیگ نہ بوتگ اِنت ، دگ بند کُتگ انت گڑا مھلوک ءِ اڑ ءُ جنجال اشاں گندگ ءَ اتکگ انت زاناں ما راج ءِ نہ اِنت مئے تکلیف گندگ ءَ نہ ایت –
سمی دین ءَ اے گپ بلوچستان ءِ سروزیر ءِ پریس کانفرنس ءَ پد جتگ انت – کہ اود ءَ اھوالکاراں گوں تران کنان ءَ سر وزیر ءَ بیگواھیں مردمانی کھولانی بگیری ءَ گامگیج زورگ ءِ ھاتر ءَ گوشتگ ءُ اے ھم گوشتگ کہ زورانسری آوار جنی ءِ جیڑہ سوبائی سرکار ءِ جیڑہ نہ انت –
سمی دین بلوچ ءَ دلگوش گوں سر وزیر ءَ کُتگ ءُ گوشتگ کہ ما اسلام آباد ءَ ھم شُتگ انت، ریڈ زون ءَ زھرشانی ھم کُتگ ءُ ھمے وھد ءَ مزن وزیر عمران خان ءَ گند ءُ نند ھم کُتگ، نوں تو بہ گوش ما کُجا بہ رو ایں ؟
آئی ءَ دیمتر ءَ گوشتگ کہ آرمی ءِ سروک مئے گوم ءَ گند ءُ نند نہ کنت، جی ایچ کیو ءَ ما شُت نہ کن ایں، کور کمانڈر ءَ گوں گند ءُ نند ءِ لوٹ کُتگ اشی ءَ ھم تو کُت نہ کن ئے ماھے ءَ گورنر کارگس ءِ دیم ءَ نشتگ انت ما دلگوش دیگ نہ بوتگ اِنت گڑا ما لاچار بوتگیں کہ دگ بند کُرتگ انت گڑا نوں مھلوک ءِ اڑ ءُ جنجال گندگ ءَ اتکگ انت زاناں ما راجے نہ اِنت مئے تکلیف گندگ ءَ نہ ایت؟
زانگ بہ بیت بیگواھیں مردمانی کھولانی گورنر کارکس ءِ دیم ءَ ریڈ زون ءِ نندانک ءَ مروچی سِی ءُ چار روچ سرجم بوتگ انت – پنجاہ ءَ گیش بیگواھیں مردمانی کھولاں ماھے ءَ گیش انت کہ وتی لوٹانی منارینگ ءِ ھاتر ءَ نندانک ءَ نشتگ انت – مروچی بیگواھیں مردمانی کھولاں وتی زھرشانی ءِ تہ ءَ گیشی آورتگ ءُ ڈپٹی کمشنر ءِ زیکیں روچ ءَ کول ءِ سرجم نہ کنگ ءِ بگیری ءَ مروچی پد ءَ جی پی او چار راہ ءُ سرینہ ھوٹل ءِ دیم ءَ اسمبلی چار راہ بند کنگ بوتگ انت –
مروچی سھب ءِ ادار یانزدہ ءَ اسمبلی چار راہ ءِ دگ ءُ جی پی او چار راہ بند کنگ بوتگ انت اسمبلی چار راہ ءُ ڈی پی او چار راہ ءَ مروچی ڈی سی او ءُ شال ءِ ایس ایس پی ءَ اتکگ ءُ زھرشانی کنوکانی گوم ءَ گند ءُ نند کتگ ءُ ھمے گوشتگ کہ ایڈیشنل چیف سیکٹری ءُ ڈی آئی جی کائنت ءُ گوں شما گند ءُ نند کن انت –
ھمے وھد ءَ بیگواھیں مردمانی کھولاں گوشتگ کہ آ پہ گند ءُ نند میا انت بلکیں آھانی گور ءَ مئے جیڑھ ءَ گیش ءُ گیوار بہ کن انت – ڈی سی او ءُ ایس ایس پی ءَ آ باور کنائینتگ انت کہ آ گوں ھمے واکداراں گوں گند ءُ نند کن انت ءُ شپ ءِ ادار دہ ءَ ادارھانی زمہ دار الم گوں شما گند ءُ نند کن انت – گڑا پد ءَ رند ءَ بیگاہ ءِ ادار پنچ ءَ جی پی او چار راہ ءِ دگ پچ کُتگ –