نبشتانک: گوریلہ جنگ
نبشتہ کار: ھُدا وشک ءُ مھمد پاروک بلوچ
گُڈی بھر
دی بلوچستان پوسٹ
ھمے ڈول ءَ سوریا ءِ کُرد ھم سوبین بیتگ انت ءُ ترکی ءِ زیردستیں کُردانی راجی جُھد انگت ءَ برجاہ اِنت۔ ھمے داب ءَ بلوچ راجی آجوئی ءِ چیرجنگ سَے بر ءَ چِست بوتگ ءُ نزور تر اِت بلے چارمی کہ چَہ 2001 ءَ بُنگیج بوتگ گِند ئے ایشی ءَ ھر وڑ ءَ بے کساس دیمروی کتگ۔ توری دژمن ءَ اے باور ئِے کنائینگ کہ ما دگہ راجے ایں، ما گوں روایرشُت ءُ رودرآتکیں دژمن ءَ ھچ وڑیں سْیادی یے نہ دار ایں بلکیں راج ءِ تہ یک ٹوھیں راجی آجوئی ءِ آگاھی ءُ سرپدی یے ودی بوتگ پمیشکا ھما چیرجنگولاں وتی زیردستیں راج ءِ پلہّ مُرزی گون بوتگ آ ھچبر پْروش نہ ور انت ءُ نیکہ کہ چیرجنگ ءِ ھلاپ ءَ کسے سوبین ھم بوتگ درور کہ امریکہ، نیٹو ءُ سوت روس ءِ وڑیں سُپرپاور دلیریں راجانی چیرجنگ ءَ بےبس بیتگ اَنت گُڑا مئے پنڈوکیں دُژمن مئے راجی آجوئی ءِ چیرجنگ ءِ دیم ءَ چون اوشت ایت۔
البت ما بے ھال مہ بَہ ایں کہ لھتیں مُلکاں چہ وتی بودناک ءُ سوھوئیں سْیاسی رھشون ءُ لشکر ءِ اڈ کتگیں مراسا ءُ ملکی دستور ءُ رھبند ءِ سر ءَ کارکنگ ءِ آسر ءَ وتی ھلاپ ءَ چیرجنگاں پْروش داتگ انچوشکہ ھندوستان ءَ کشمیر ءِ نیکراھی چیرجنگ ءُ روس ءَ چچنیا ءِ چیرجنگ ءَ پروش داتگ۔ جھان ءِ بلاھیں سْیاسی ءُ لشکری سروگانانی رِد ءَ چیرجنگ ءَ پْروش دیگ ءَ جھل ءِ رِد ءُ رھبندانی سر ءَ دلگوش کنگ بہ بیت-
زیردستیں راج ءَ زیت استانی بھر (سٹیٹ، پرونس) ءَ نیم وتواجھی ءَ بہ دے کہ زیردستیں راج وتی سرکار ءَ وت گیچِن ایت ءُ اڈ بدنت، زیردستیں راج ءِ ورناھاں پوریاگِری ءُ شھر ءُ دمگاں ھر وڑیں بُنکی آسراتی ءُ دیمروی بہ دے کہ چیرجنگول ءِ جِند ءِ راج چیرجنگ ءَ کُمک مہ کنت ءُ نبا لس مھلوک ءِ تہ ءَ گلامی ءِ مارشتے ودی بیت۔ درور کہ روس ءَ چچنیا ءُ ھندوستان ءَ کشمیر ءَ را داتگ انچوشکہ تو ھچبر نہ اشکت کہ کشمیر ءَ ورگی آپ، لین ءُ بے پوریاگِری ءِ جیڑھے وَ ھست۔
زیردستیں راج ءِ چیرجنگول ماں جنگی پِڑ ءَ کُشگ بہ بنت بلے دزگِر کنگ ءُ رند ءَ ھچبر کُشگی نہ اَنت بلکیں راجداری پولیس ءُ آمیدگِساں شھار کنگی اَنت کہ ترامگیج وت سرکاری رھبند ءِ ھساب ءَ سزا یا مُز ئِے بہ دنت۔بزاں سرکار ءِ ھر ترامگیج ءَ وتی کار کنگ ءِ موکل ھست انت ءُ ھر ترامگیج وتی کاراں سرکاری رِد ءُ رھبند ءِ ھساب کنت۔
چیرجنگول ءِ کھول کہ شھراں نشتگ انت سرکاری لشکر آیاں ھچبر تکانسر مہ کنت بلکیں آیاں گوں وشیں دابے ءَ دزبندی کنت کہ وتی زھگ ءُ براتاں بہ گْوش اِت کہ سِلاہ دور دے اَنت نبا جنَگ بہ بنت ایشی ءِ مزنیں درور کشمیری رَدیں چیرجنگول بُرھان وانی اَت کہ آئی ءِ پت، برات ءُ گْوھاراں سرکار ءَ شپ داں روچ رھوت کت کہ بُرھان ءَ بہ گْوش اِت کہ سِلاہ دور بہ دنت۔ البت پت ئِے کہ مزن شھدربرجاہ ءِ پروپیسرے اَت وت منّ اِت ئِے کہ سرکاری لشکر ءَ مُدام گوں آیاں وشتبی ءَ گپ کُت، ھچبر لوگ ءِ ازت اش لگتمال نہ کتگ۔
وتی راج ءِ سر ءَ ٹوھیں سِلاہ انچوشکہ بالیگراب ءُ پِرکیانی تیرگواری ھچبر مہ بیت کہ چریشی ءَ راج وت ءَ زیردست پھم ایت ءُ لس مھلوک گیشتر بِگُڑ ایت دومی راج ءِ ورنائیں نودربر ءُ بےگناھیں ورنا ھچبر چِست، کار ءُ بیگواہ کنگ مہ بنت چی ءَ ایشانی سر ءَ لٹ شاپی، کُشگ ءُ دگانی سر ءَ لاشانی دور دیگ زیردستیں راج ءِ زِرد ءِ تہ ءَ زورانسر ءِ ھلاپ ءَ پِٹ ءُ زھرے ودی کنت بلکیں راجی گلامی ءِ مارشتے ودی بیت پد ءَ ایشی ءِ پائدگ چیرجنگولاں رس ایت اے آسر ءَ ھرکسے آیانی گل ءَ ھوار بیت ءُ زورانسر پْروش وارت۔
نی گُڈسری ما زورانسر ءِ پْروش ورگ ءِ سر ءَ گپ کن ایں کہ اگاں زورانسریں دُژمن ءِ سیاسی ءُ لشکری رھشوناں وتی جیڑھانی توجیلے درگیجگ ءِ بودی نیست گُڑا زورانسر ءِ لشکر زیت ماں چیرجنگ ءَ پْروش وارت ءُ گُلامیں راج گلامی ءِ سانکلاں سند ایت۔ چوناھیگا ھمے پْروش گوں زیردستیں راج ءِ لس مھلوک ءِ راجی زرمبشت ءُ آگاھی ءَ وازمند انت کہ اگاں راج ءِ تہ ءَ راجی گلامی ءِ مارشت ءُ راجی جُنز ءِ آگاھی ھست گُڑا زیت آجو بیت اگاں نہ انت ئِے گُڑا دیر وت آگاھی یے زُور ایت۔ وھدیکہ چیرجنگ دْراج ءُ تْرُند بیتگ گُڑا زورانسر پْروش وارت ءُ لھتیں پْروش ورگ ءِ نشانی ایش انت۔ زورانسر سیاسی جُھدکار ءُ لس مھلوک ءِ لوگ ءُ ھنداں ماندار ایت ءُ آیانی سر ءَ بے کساس لٹ شاپی کنت۔
سرکاری ترامگیج انچوشکہ پولیس ءُ آمیدگِس ءِ ھچ وڑیں بستارے نہ بیت یا ھمے ادراہ ھم سرکاری لشکر ءِ سان زور اَنت ھر شپ ءُ روچ زیردستیں راج ءِ ورناہ چِست، گار ءُ بیگواہ بنت یا لھتیں روچاں رد لٹ شاپ ءُ تیر وارتگیں جون اش دست کپ انت۔
چیرجنگ ءِ ھرچگ سرکار ءَ انچو بے وانک کنت کہ سرکاری لشکر چہ زیردستیں راج ءِ راجدْروہ، کاسگ چٹّ، دُزّ ءُ ڈنگاں ودی کنت ءُ چیرجنگولانی ھلاپ ءَ کارمرز کنت کہ ھمے دمگ ءِ ھر جاہ سوھو اَنت۔
زورانسر چہ زیردستیں راج ءِ راجی زبان ءَ سَک تُرس ایت پمیشکا ماں وانگجاھاں گلامیں راج ءِ زھگ ءُ پدریچ ءَ آئی جِند راجی زبان ءِ وانگ ءُ نبیسّگ موکل نہ دنت چی ءَ کہ دژمن وَ زانت وھدیکہ راج ءِ مھلوک زبان دوست بیتگ گُڑا گلامی نہ منّ ایت ئِے۔ زورانسر وتی مجگ ءَ ھمے نادْراھی ودی کنت کہ اے راج نی ما لٹ ءُ بوٹ ءِ زور ءَ منّینّ ایں۔
بلے چہ چوشیں زُلم ءُ زورانسری ءَ زیردستیں راج ءِ لس مھلوک گیشتر تکانسر بیت ءُ دُژمن ءِ ھلاپ ءَ نپرے ودی کنت پد ءَ ابرمی گلامی ءِ مارشت وَ ودی بنت۔
شالا زورانسری ءَ پْروش بات، گلامی ءَ پِٹ بات ءُ آجوئی زندگ بات شالا انچُوش بات۔
ھلاس اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔