کیچ ءَ پاکستانی لشکر ءِ سر ءَ بمب اُرش ءِ زِمہ واری ءَ منّ اِیں- بی ایل ایف

بلوچستان لبریشن فرنٹ ءَ کیچ ءِ ھند کولواہ بدْرنگ ءَ پاکستانی لشکر ءِ سر ءَ ریموٹ کنٹرول بمب اُرش ءِ زِمہ واری منّ اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشانی ءَ گْوشتگ کہ بیست ساچان ( 20 اگست ) ءَ سُھب ءِ ادار ھپت ءَ مئے سرمچاراں کیچ ءِ ھند بدْرنگ ءَ پاکستانی لشکر ءِ گشتی ٹولی ( گشتی ٹیم ) ءِ سر ءَ گوں ریموٹ کنٹرول بمب ءَ اُرش کُتگ، اُرش ءِ آسر ءَ لشکر ءِ یک کارمندے مُرتگ ءُ بازینے ٹپّی بوتگ اَنت، پرپٹ ءُ گاڑی ءَ را باز تاوان رس اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی درشان ءِ گُڈّسر ءَ گْوشتگ کہ زُورگِریں لشکر ءِ سر ءَ مئے اے اُرش دانکہ زیردستیں بلوچستان ءِ وتواجھی ءَ گوں تْرندی ءَ برجاہ بَہ اَنت۔