مئے دوستیگین مردمانی زندگیانی رکینگ ءَ وتی کرد ءَ پیلو بہ کن اِت – شال ءَ نندانک ءَ نشتگیں زھرشانی کنوک

گوستگیں ماہ ءَ زیارت ءَ پیسر ءَ دزگیریں بیگواھیں مردمانی دروگیں دیم پہ دیمی کوش ءَ پد بلوچستان ءِ بنجاھی شھر شال ءَ ریڈ زون ءَ گورنر ھاؤس ءِ دیم ءَ کھولانی برجاھیں زھرشانی ءَ مروچی بیست ءُ نُھمی روچ ءَ برجاہ بیتگ –

پنچ فروری دوھزار ءُ پانزدہ ءَ شال ءَ آوار جنگ بیتگیں اسرار برکت ءِ کھول نندانک ءَ ھوار بیتگ ءُ زھرشانی ءِ بھر جوڑ بیتگ اَنت ھمے وھد ءَ اسرار برکت ءِ گوھار عائشہ برکت ءَ وتی برات ءِ یل کنگ ءِ لوٹ کتگ –

بیگواھیں مردمانی کھولانی گوشگ اِنت مروچی زھرشانی نندانک ءَ یک ماھے سرجم بیگی اِنت بلے داِں انگت ءَ لوٹ ھچ وڑ ءَ منگ ءَ ھچ وڑیں گامگیج زورگ بیگ ءَ نہ اِنت-

کھولاں چہ سرکار ءَ لوٹ کتگ کہ زیارت ءِ وئیل ءَ یک کمیشنے جوڑ کنگ ءُ راستیں رنگے ءَ پٹ ءُ پول کنگ دوبارہ دزگیر کنگ بیتگیں مردم دروگیں جنگ ءِ نام ءَ کُشگ مہ بنت-

داں انگت ءَ استانی سرکار ءُ بنجاھی سرکار ءِ نیمگ ءَ ھچ وڑیں گامگیج دیم ءَ نیتکگ اَنت-

شال ءَ ھورانی گوارگ ءَ کھول ءُ زھگاں بازیں اڑ ءُ جنجالانی دیمپانی اِنت-

ھمے وھد ءَ بیگواھیں انسانی ھکانی باسک راشد ھسین ءِ مات ءَ یک برے پد ءَ سرکار ءَ چہ لوٹ کتگ منی زھگ ءَ ھوار دگہ بیگواھیں مردمانی یل کنگ ءَ المی بہ کنت ءُ آیاں آمیدگساں پیش بہ کنت-

آئی ءَ گشتگ کہ اے ناوشیں مولم ءُ ھور ءَ اد ءَ زھگ ءُ ما ناوشیں جاورانی دیمپان اِنت بلوچستان ءِ سیاسی پاٹی ءُ انسانی ھکانی گل مئے گون ءَ ھوار بہ بنت ءُ مئے زھگانی زندگیاں بہ رکین اَنت –