شال ءَ بیگواھیں مردمانی کھولانی نندانک ءُ زھرشانی برجاہ

زیارت ءِ لشکر کشی ءُ دروگیں میڑ ءِ بگیری ءَ بلوچستان ءِ بنجاھی شھر شال ءَ بیگواھیں مردمانی کھولاں مروچی بیست ءُ ھشت روچ سرجم بوتگ انت کہ گورنر کارگس ءِ دپ ءَ نندانک ءِ جتگ ءُ نشتگ انت –

مروچی بیگواھیں مردمانی کھولاں منوجان چار راہ ءَ بگر تاں گورنر کارگس ءِ دپ ءَ روانک ءِ کش اِتگ –

بیگواھیں مردمانی کھولاں گوستگیں روچ ءَ شال ءِ جتا جتائیں جاھاں زھرشانی بنجل برجم کُتگ انت کہ مروچی ھمودا بگر تاں نندانک جاہ بزاں گورنر کارگس ءِ دپ ءَ زھرشانی روانک ءِ کش اِتگ – زھرشانی روانک ءَ بیگواھیں مردمانی کھولانی ھمراھی ءَ مزنیں کچ ءَ سیاسی پاٹی ءُ نودربرگلانی باسک ھمراہ بوتگ انت –

بیگواھیں مردمانی کھولاں گوستگیں بیست ءُ ھشت روچ انت کہ نندانک ءَ نشتگ انت کھول وتی دوستیگیں مردمانی یل کنگ ءِ لوٹ ءَ کنگ ءَ انت –

زھرشانی ءَ تران کنان ءَ بیگواھیں مردمانی کھولانی گوشگ ات کہ سرکار گیرسنجیدگی کنگ ءَ انت پرچا کہ بیگواھیں مردمانی کھولاں چار ھپتگ انت کہ زھرشانی نندانک ءَ نشتگ انت ءُ آھانی تہ ءَ شیرمچیں زھگ ءُ پیریں زالبول ھم ھوار انت بلے ھاکم دھ گام نہ جن انت ءُ آھانی لوٹانی گوشدارگ ءَ رازی نہ انت –

کھولانی گوشگ ات کہ نندانک گوستگیں ماہ ءِ بیست ءُ یک جولائی ءَ بندات کنگ بوتگ کہ ھنگت برجاہ انت ءُ اے درگت ءَ مئے سَے لوٹ بوتگ انت – اولی لوٹ ھمے بوتگ کہ زیارت وئیل ءِ بگیری ءَ جوڈیشل انکوائری کمیٹی ءِ اڈ دیگ بہ بیت، دومی بیگواھیں مردمانی کھول باور کنائینگ بہ بنت کہ آھانی دوستیگیں مردم دروگیِں میڑ ءِ نام ءَ جنگ نہ بنت ءُ سیمی بیگواھیں مردم یل کنگ بہ بنت –

آھانی گوشگ ات کہ اولی لوٹ ءِ بزاں زیارت ءِ وئیل ءِ بگیری ءَ جوڈیشیل کمیٹی ءِ اڈ دیگ بوتگ بلے ما اے گپ ءَ پدر کنگ لوٹ ایں کہ آئی ءِ سر ءَ تنی وھدی دیمتر ءَ کار کنگ نہ بوتگ ءُ ناکہ ھما کھولانی کہ مردم جنگ بوتگ انت آھانی گوم ءَ ھال اھوال کنگ بوتگ ءُ ناکہ جونانی ڈی این اے ءُ پوسٹ مارٹم ءِ گپ بوتگ کہ ما ھمے پھم ایں مزن آمیدگس ءُ جوڈیشل کمیشن ءِ گچین کتگیں جج گیر سنجیدگی ءَ زاھر کنت –

زھرشانی ءَ تران کنان ءَ وائس فار بلوچ مسنگ پرسنز ءِ جنرل سیکٹری ءُ بیگواھیں دین محمد ءِ زھگ سمی دین بلوچ ءِ گوشگ ات کہ مروچی چہ رسانکدراں مارا ھمے ھال سربوتگ کہ سوبائی سرکار ءَ وزیر داخلہ ءِ سرکماشی ءَ پارلیمانی کمیٹی ءِ جوڈ کنگ ءِ جار جتگ بلے مئے گوم ءَ مئے گل ءِ یا بیگواھیں مردمانی کھول ءِ گوم ءَ ھچ کس ءَ اے درگت ءَ ھال اھوال نہ کُتگ ءُ ناکہ مئے پیش کتگیں لوٹ یا بیگواھیں مردمانی لڑ ءِ درگت ءَ گامگیج زورگ بوتگ ما ھمے گندگائیں کہ اے جیڑھانی درگت ءَ سرکار گیرسنجیدگ انت –

سمی دین بلوچ ءِ گوشگ ات کہ نون ماہ ءِ سرجم بوگ ءَ انت کہ بیگواھیں مردمانی کھول گورنر کارگس ءِ دپ ءَ نندانک جتگ ءُ نشتگ انت بلے تنی وھدی سرکار مئے لوٹانی منّگ ءُ گوشدارگ ءَ سنجیدگ نہ انت – آئی ءَ گوشتگ کہ اگاں سرکار ءُ برزی تبک ءِ ھاکماں ھمے وڈ وتارا داشت مارا منگ ءُ گوشدارگ نہ بوت گڈا مئے دیمتری گامگیج ترندتر بنت – ما سرکار ءَ باز وھد داتگ ءُ سک باز اوپار ءُ ودار ءِ دامن گپتگ –

زھرشانی ءَ درنگاز کنوکانی گوشگ ات کہ ما برزی تبک ءِ ھاکم ءُ ھستیں وھدے سرکار ءَ ھمے گوشگ لوٹ ایں تاں ھما وھد ءَ.مئے لوٹ منّگ نہ بوتاں ما وتی زھرشانی ءَ ھمے وڈ برجاہ دار ایں ءُ اشی تہ ءَ گیشی کار ایں ھمے میان ءَ مئے کھولانی مردماں ھرچی کہ بیت آئی ءِ زمہ دار ریاست ءُ آئی ءِ ھاکم انت –