بلوچستان:ھئور ءُ ھارانی تباھی برجاہ

بلوچستان ءِ جتا جتائیں ھند ءُ دمگاں ھئور ءُ ھارانی تباھی ءِ درچ برجاہ انت – گوستگیں شپ ءَ ھئور ءُ ھاراں لہڑی ءُ سبی ءِ کش ءُ گور ءِ دمگاں تباھی آرتگ –

لہڑی کور ءَ دو لک کیوسک ءَ گیش آپ یک جاہ بوتگ بازیں میتگ ءِ ھار ءَ بُرتگ انت – ھزارانی کچ ءَ مردم بے گس بوتگ انت ءُ پچیں آزمان ءِ چیر ءَ زند گوزینگ ءَ لاچار انت –

لہڑی ءَ اتکگیں توپانی ھار ءَ شش ءَ گیش میتگ برتگ انت – ھزارانی کچ ءَ مردم بے گس بوتگ انت ءُ چانڈیہ میتگ ھم ھار ءِ زد ءَ اتکگ –

دومی نیمگ ءَ ڈیرہ بگٹی ءُ کُچگی دمگاں ھئورانی سوب ءَ جھلی میتگاں آپ اتکگ –

چہ کوہ سلیمان ءَ مزنیں ھار ءِ دیم پہ رودراتکی دمگاں اتکگ –

لیویز ءِ رِد ءَ توبہ اچکزئی ءَ شش جاھاں مزنیں توپان اتکگ ءُ یک گاڑی ءِ ھار ءَ بُرتگ بلے گاڑی ءَ سواریں مساپر رک اِتگ انت –

حسار ھار ءَ یک مردمے برتگ کہ آئی ءِ شوھاز برجاہ انت، وھدیکہ توبہ اچکزئی ءَ ھار ءَ برتگیں دو مردمانی جون در کنگ بوتگ انت –

لیویز واکدارانی رِد ءَ قلعہ عبداللہ ءَ سَے روچانی میان ءَ ھشت مردم بیران بوتگ انت –

بلوچستان ءَ برجاھیں ھئور ھارانی سوب ءَ دگہ یانزدہ مردم بیران بوتگ انت – بیران بوتگیں مردمانی کچ نوکیں کساساں ھوار یکسد ءُ نود ءُ نُھ ءَ سربوتگ انت وھدیکہ ھشتاد ءُ یک مردم زدگ بوتگ انت ءُ بلوچستان ءَ نوزدہ ھزار ءَ گیش گِس ھارانی آماچ بوتگ انت –

پی ڈی ایم اے ءِ نیمگ ءَ بلوچستان ءِ درگت ءَ شنگ بوتگیں رپورٹ ءِ رِد ءَ یکشمبے ءِ روچ ءَ موسی خیل ءَ دھ وھدیکہ قلعہ عبداللہ یک مردمے ءِ مرگ ءِ ھال ءِ راست بوگ ءَ پد بیران بوتگیں مردمانی کچ یکسد ءُ نود ءُ نھ ءَ سربوتگ انت وھدیکہ ڈیرہ بگٹی ءَ سَے مردمانی زدگ بوگ ءَ پد زدگ بوتگیں مردمانی کچ ھشتاد ءُ یک انت –

رپورٹ ءِ رِد ءَ قلعہ عبداللہ ءَ سِی گِس سرجمی ءَ وھدیکہ پانزدہ گِساں کمے باز تاوان رستگ انت وھدیکہ کوھلو ءَ دھ گِس سرجمی ءَ پانزدہ کم تاوان رستگ انت ھمے وڈ ڈیرہ بگٹی ءَ ھم پنچ گِس سرجمی ءَ تباہ بوتگ انت کہ چریشاں پد بلوچستان ءَ سرجمی ءَ نوزدہ ھزار ءُ ھپسد ءُ شست ءُ دو گِس تباہ بوتگ انت اشانی تہ ءَ پنچ ھزار ءُ یکسد ءُ ھپت سرجمی ءَ وھدیکہ چاردہ ھزار ءُ شش سد ءُ شست ءَ کم باز تاوان رستگ انت –

پی ڈی ایم اے ءِ رپورٹ ءِ رِد ءَ بلوچستان ءِ تہ ءَ ھئور ھاراں یک لک ءُ ھپت ھزار ءُ سَے سد ءُ ھپتاد ءُ ھپت دلوت مُرتگ انت – شش سد ءُ نود کلومیٹر دگ ءُ ھژدہ پُھل پُرشتگ انت – رپورٹ ءِ رِد ءَ سبی، دکی، موسی خیل ھارانی سوب ءَ جاور ھنگت نگیگ انت وھدیکہ قلعہ عبداللہ، شال، سبی، کوھلو ءُ دگہ ھند ءُ دمگاں کمکی مڈی دیم دیگ بوتگ انت –