لندن: بی این ایم ءَ ماں برتانیا ءِ بنجاھی شھر لندن ءَ پاکستانی سپارتجاہ ءِ دیم ءَ زھرشانی کرتگ۔ اے زھرشانی پاکستانی لشکر ءِ دست ءَ ماں زیارت ءَ 11 پہ زور بیگواھیں مردمانی دروگیں میڑ ءُ دزگیری ءِ کوش ءِ بگیری ءَ ءُ بلوچستان ءِ بنجاھی شھر شال ءَ چہ گْوستگیں ھپتگے ءَ نندانک ءَ نشتگیں پہ زور بیگواھیں مردمانی کھول ءَ گوں ھمدلی ءِ درشان ءَ کنگ بیتگ۔اے زھرشانی ءَ مزنیں کچے ءَ مردماں بھر زرتگ۔اے مردمانی تہ ءَ ورلڈ سندھ کانگریس ءِ مزن کارگشاد ڈاکٹر لکو لوھانہ ءُ بلوچ راجی زْرمبش ءِ ابدللہ بلوچ ھم ھوار بیتگ اَنت۔
زھرشانی کنوکانی دست ءَ جرنبشت ءُ تاک نبشت بیتگ اَنت کہ آیانی تہ ءَ پہ زوریں بیگواھی ءُ دروگیں میڑانی بگیری ءَ ءُ پہ بلوچستان ءِ آجوئی ءِ پلہ مرزی ءَ اوگام نبشتہ بیتگ۔زھرشانی کنوکاں پہ زوریں بیگواھی ءُ بلوچ چکچینی ءِ بگیری ءَ اوگام جتگ۔ پر ایمنیں زھرشانی ءِ میان ءَ پاکستانی سپارتجاہ ءَ دزمانجنی کرتگ ءُ بھر زیروک بْرانز دیگ ءِ کوشست کرتگ اَنت بلے چہ ایشی ءَ ابید ھم بھرزیروکاں گوں پر ایمنی ءَ وتی زھرشانی برجاہ داشتگ۔
گوں زھرشانی کنوکاں گپ جنان بی این ایم ءِ کستریں کمک کارگشاد ھسن دوست ءَ گْوشتگ پاکستان ءَ 11 بے میاریں پہ زور بیگواھیں مردم ماں زیارت ءَ کشتگ ءُ آ سلاھبندیں گلے ءِ باسک پیش دارگ ءِ کوشست کرتگ اَنت بلے ما ءُ جھان اے گپ ءَ زان ایں کہ مزنیں کچے ءَ بلوچ، سندی ءُ پشتون پاکستان ءِ ناراھیں زندان ءَ اَنت۔ مروچی چاگردی رسانکدر ءِ باریگ ءَ پاکستانی دْروگ پاشک بیتگ۔پاکستان کوشست کنگ ءَ اِنت کہ بلوچ زْرمبشت ءَ گوں زوراکی ءَ آسر بہ کنت بلے من آیاں گْوشگ لوٹ آں کہ مروچی داں ھمینچک ءَ کہ چک ءُ جنین ھم آیانی دیم ءَ پہ بلوچ آجوئی ءِ زْرمبشت ءَ اوشتاتگ اَنت۔
آئی ءَ گْوشتگ پاکستان بلوچستان ءَ مردمی اگبالاں لپاشگ ءَ اِنت ءُ جنگی میارانی تہ ءَ گون اِنت۔ اے مئے لوٹ اِنت کہ ھم سنتیں راج الم دزمانجنی بہ کنت ءُ ماں بلوچستان ءَ وتی کرد ءَ پیلو بہ کنت۔
ڈاکٹر لکو لوھانہ ءَ گْوشتگ کہ ما مروچی چہ اد ءَ پاکستان ءَ اے گْوشگ لوٹ ایں کہ تو چکچینی کنگ ءَ ئے، تو بلوچستان ءَ مردمگری ءِ بگیری ءَ میار کنگ ءَ ئے ءُ تو بہ زان ئے کہ چہ تو پیش ھم اد ءَ رجیمے بیتگ ءُ آئی ءَ ھمے میار کرتگ اَنت۔پاکستان ءَ بلوچستان پہ زور گیپتگ ءُ راجے ءِ بستار ءَ بلوچ آجوئی لوٹ اَنت، اے چیردست دارگ نہ بیت۔پاکستان سک باز زوراک جوڑ بیتگ کہ وتی آزار جاھاں بندیں بے میاریں مردماں کشگ ءُ مارا ترسینگ لوٹ ایت۔
بلوچ راجی زْرمبش ءِ ابداللہ بلوچ ءَ تْران کنان ءَ گْوشتگ دروگیں میڑان بے میاریں مردمانی کوش جھان ءَ مزنیں جنگی میارے۔ھزارھاں بلوچ پاکستانی آزار جاھاں بند اِنت ءُ پہ مئے ترسینگ ءَ آ دروگیں میڑاں کشگ بیگ ءَ اَنت بلے مردمگری چہ آیانی ترس ءَ گیشتر توانمند اِنت۔
بی این ایم یوکے تک ءِ سرکماش منزور ءَ گْوشتگ پاکستان راجمستری ءِ منوگریں ڈیھے نہ اِنت بلکیں ناشرکاریں لشکر ایشی ءَ ھلائینگ ءَ اِنت۔ما اد ءَ پاکستانی سپارتجاہ ءِ دیم ءَ چہ آیاں چیزے ءِ لوٹگ ءَ زھرشانی کنگ ءَ نہ ایں بلکہ ما زان ایں کہ اے پاکستانی لشکر ءِ چانیگ پنڈ اَنت بلکیں ما جھان ءَ پاکستان ءِ راستیں چھرگ ءِ پیش دارگ ءَ اد ءَ یکجا بیتگ ایں۔
گڈی ءَ بی این ایم یوکے تک ءِ کارگشاد ءَ بھر زیروکیں مردمانی منت گیپتگ ءُ گْوشتگ کہ ما اد ءَ دروگیں میڑاں بے میاریں مردمانی کوش ءِ بگیری ءَ یکجا بیتگ این ءُ ما گوں پہ زوریں بیگواھیں مردمانی کھولاں ھمدلی درشان کنگ ءَ ایں۔ ما آیاں گْوشگ لوٹ ایں کہ آ اے جھد ءَ وتءَ ایوک سما مہ کن اَنت بلکیں سرجمیں بلوچ راج آیانی ھمراہ اِنت۔مئے بے ڈک ءُ بندیں پلہ مرزی گوں سانمندیں کھولان اِنت۔ما گوں میان استمانی واک گچینی ھم سنتیں راج، یورپی سنت، برتانیا ءُ گوں امریکا ءَ لوٹ کن ایں کہ آ پاکستان ءِ سر ءَ زیت پابندی بہ جنت ءُ پاکستان ءَ داں ھما وھدی کمک مہ دنت کہ پاکستان بلوچ ءِ چکچینی ءُ ماں بلوچستان ءَ مردمگری ءِ بگیری ءَ وتی بدیں کارپداں آسر مہ کنت۔ چہ ایشانی بے تواری ءَ پاکستان ءَ گیشتر زوراکی کنگ ءُ بلوچ ءِ چکچینی ءِ ھاٹیگ رس ایت۔