بلوچ نیشنل موومنٹ نیدرلینڈز ھنکین ءِ نیمگ ءَ دی ھیگ انٹرنیشنل کورٹ آف جسٹس ءِ دیم ءَ پاکستانی پوج ءِ دست ءَ بلوچستان ءَ زورانسری آوار جنگ بیتگیں ءُ بیگواھیں مردمانی دروگیں میڑانی تہءَ کُشگ ءِ بگیری ءَ زھرشانی کنگ بوتگ-
زھرشانی کنوکاں بلوچستان ءَ زورانسری آوار جنی ءُ زورانسری بیگواھیں مردمانی دروگیں میڑاں کُشگ ءِ بگیری ءَ اوگام جتگ-
بی این ایم ءِ نیمگ ءَ اے درگت ءَ پنتاک ھم بھر کنگ بوتگ کہ آئی ءِ تہءَ بلوچستان ءَ زورانسری بیگواھیں مردم ءُ پاکستانی پوج ءِ بلوچستان ءَ برجاھیں زوراکی ءِ درگت ءَ دمگی مردم سرپدی داتگ اَنت-
اے زھرشانی ءَ زلبول ءُ چُکاں ھم بھر زرتگ-
زھرشانی ءَ تران کنان ءَ بی این ایم ءِ نیدرلینڈز چیپٹر ءِ باسک جمال بلوچ ءَ گْوشتگ کہ پاکستان ءَ یازدہ بے میاریں مردم دروگیں میڑاں کُشتگ اَنت کہ آ بیگواھیں مردم بوتگ اَنت آ پیسر ءَ چہ پاکستانی پوج ءَ چست کتگ ءُ وتی آزارجاھاں بندی کتگ اَنت-
آئی ءَ گْوشتگ کہ زورانسری آوار جنگ بوتگیں بلوچاں دروگیں میڑاں کُشگ پاکستانی پوج نیمگ ءَ چہ بلوچ چُکچینی ءِ درچ اِنت-