بلوچستان لبریشن فرنٹ ءِ جارکش میجر گہرام بلوچ ءَ رسانکدرءَ شنگ کُتگیں یک درشانی ءَ خضدار ءِ ھند کھٹان ءَ پھازگی ءِ ھاترءَ داشتگیں پاکستانی لشکریانی بنجل ءِ سرءَ بمب اُرش ءِ زمہ واری من اِتگ۔
گہرام بلوچ ءَ گُشتگ کہ گوستگیں شپ ءَ مئے سرمچاراں بلوچستان ءِ دمگ خضدار کھٹان ءَ نمبر ھپت ءَ بستگیں پھازگی لشکریانی چوکیءِ سرءَ گوں دستی بمب ءَ اُرش کُتگ۔
آئی ءَ گُشتگ کہ پھازگی ءِ ھاترءَ بستگیں پوجی بنجل ءِ سرءَ بمب اُرش ءِ سوب ءَ یک کارمندے ھما دمان ءَ مُرتگ ءُ دو ٹپی بیتگ اَنت۔
آئی ءَ گُشتگ سرمچار شھری چیرجنگی تکنینکاں گوں قوضہ گیریں لشکریانی اُرش کنگ ءَ پد پہ سلامتی درکپگ ءَ سوبمند بیتگ اَنت۔جارکش ءَ گُڈسرءَ گُشتگ کہ قوضہ گیریں لشکر ءِ سرءَ اُرش داں بلوچستان ءِ آجوئی ءَ برجاہ مان اَنت۔