بلوچستان ءِ دمگ مستونگ ءِ بازار کھڈ کوچہ چوٹوک کمر کلی حسنی ءِ جھمنند ملک عبدالحکیم شاہوانی ءَ وتی لوگیگ ءُ جنک ءِ پجیگ ءَ سراوان پریس کلب ءَ پریس کانفرنس کنان ءَ گوشتگ کہ گوستگیں شپ ءَ پاکستانی لشکریانی کارمنداں مئے لوگ ءِ سر ءَ بیڑ بُرتگ ءُ مئے دویں بچکیں چُک نور اللہ شاہوانی ءُ کلیم اللہ شاہوانی دزگیر کُتگ ءُ بُرتگ اَنت کہ آیانی درگت ءَ داں انگت ھچ پئیمیں اھوال نیست کہ آ کج ءَ اَنت ءُ چونیں جاورانی تہءَ اَنت۔
ملک عبدالحکیم شاہوانی ءَ گُشتگ کہ منی دویں چُک بے میار اَنت منی یک زھگے کلیم اللہ مدرسہ ءَ وانگ ءَ اِنت ءُ دومی زھگ نور اللہ زھمت کشی و پوریاگری کنگ ءَ بیتگ۔
آئی ءَ گُشتگ چریشی ءَ پیسر ھم لشکریاں ھم منی بچ نور اللہ نھ ماھانی ھاترءَ وتی گورءَ دزگیر کُتگ بیتگ ءُ انی بیست روچ پیسرءَ یل کُتگ اَت بلے دوشی پدءَ آ ھم دزگیر کُتگ ءُ بُرتگ اِش۔
آیاں دیمتر ءَ گُشتگ کہ مئے زھگانی بیگواہ بیگ ءَ پد ما سرجمیں کھول ءِ مردم درد اندوہ ءُ پریشانیانی تہءَ زند ءُ مرگ ءِ نیام زندگ اِنت کہ ھدا مہ کنت کہ مئے زھگانی زند ھترھانی تہءَ مہ بیت۔
آئی ءَ گُشتگ کہ ما سر وزیر بلوچستان، تہی کارانی وزیر، ایم پی اے مستونگ ءَ گوں دردمندیں دزبندی کنیں کہ ما بزگ ءُ لاچار ءُ کماشیں سندانی مات ءُ پِت اِنت مئے جاورھالانی سرءَ بزگ کنگ بہ بیت مئے زھگ نور اللہ شاہوانی ءُ کلیم اللہ شاہوانی پہ سلامتی یل کنگ ءَ باوری کنگ ءِ ھاترءَ کرد پیلو بہ کن اَنت۔