زیارت ءَ دروگیں میڑ: بیگواھیں مردمانی کھولانی زھرشانی ھپتمی روچ ءَ برجاہ

بلوچستان ءِ بنجاھی شھر شال ءَ وزیر علیٰ ءُ گورنر ھاؤس ءِ دیم ءَ زیارت وئیل ءِ ھلاپ ءَ ھپتمی روچ ءَ زھرشانی برجاہ اِنت –

اے زھرشانی گوستگیں ھپت روچ ءَ پیسر بیگواھیں مردمانی کھول ءُ وائس فار بلوچ مسنگ پرسنز ءُ آئی ءِ ھمسنتیں گلانی ھمراھی ءَ برجاہ دارگ بیتگ –

زھرشانی کنوکانی لوٹ اِنت کہ مئے بندیگیں مردماں سرکار یل بہ کنت ءُ اگاں آیاں جرمے کتگ گڑا باید آھاں سرکار وتی کانودانی رد ءَ آمیدگس ءَ پیش بہ کنت-

اے ھپت روچانی گوزگ ءَ پد ھم سرکاری نمائندگ انگت ءَ زھرشانی ءَ نندوکیں مردمانی ھال پرسی ءَ نیتکگ اَنت ءُ نانکہ دگہ چوشیں گامگیج زورگ ءَ گندگ ءَ اتکگ اَنت-

زیارت وئیل ءَ پد کھولاں اے المہ گوشتگ اَت کہ اے زھرشانی داں ھما وھد ءَ سر بیت اِنت دانکہ سرکار مارا اے گپ ءَ باور مہ کنائینت کہ شمئے مردم دوبر جنگ ءُ دور دیگ نہ بنت-

بلوچستان ءِ بنجاھی سرکار ءِ بنجاھی پتر ءَ کمے دور نیشتگیں زھگ ءُ زالبول ھور ءُ ھیروپان اوپار کنگ ءُ وتی لاچاری ءِ ودار ءَ نشتگ اَنت بلے چوشیں ھاسیں ھچ توار گندگ ءَ نئیت کہ آیانی ودار آسر کنگ بہ بنت-

مروچی زھرشانی ءَ بلوچستان بار کونسل ءِ چیئرمین رائیب بلیدی، وائس چیئرمین ایوب ترین، ایڈوکیٹ عمران بلوچ ءُ دگہ وکیل اتکگ ءُ کھولانی گون ءَ ھمدردی اش درشان کتگ ءُ آیاں لوٹ کتگ کہ بلوچستان چیف جسٹس ءِ سروکی ءَ جوڈیشل کمیشن جوڑ کنگ بہ بیت اِنت –

زانگ بہ بیت گوستگیں روچاں زیارت ءَ یک دروگیں بیڑے ءِ وھد ءَ پاکستانی پوج ءَ نُھ کسانی جنگ ءِ ٹاہ داتگ اَت ءُ چریشی ءَ پد نُھیں مردمانی لاش سول ھسپتال شال ءَ ارگ بیت اِت اَنت کہ آیانی تہ ءَ ھپت کسانی پجار بیتگ ات –

دومی نیمگ ءَ بلوچستان ءِ آجوئی ءِ واستا جد ءُ جھد کنوکیں گل بی این ایم ءَ ھم دری ڈیھانی پھناتاں دو جتا جتائیں جاھاں زھرشانی ءِ جار پرینتگ-

بی این ایم ءَ گوشتگ کہ بی این ایم یوکے ھنکین ءِ نیمگ ءَ پاکستانی سپارتجاہ ءِ دیم ءَ انیگیں دروگیں میڑ ءِ نام ءَ زورانسری بیگواھیں مردمانی کوش ءِ بگیری ءَ زھرشانی کنگ بیت اِنت-

بی این ایم ءَ گشتگ یک اگست دوھزار ءُ بیست ءُ دو ءَ پاکستانی سپارتجاہ 36.34 لونڈز اسکوائر، لندن ایس ڈبلیو 1ایگس 9جے این ءَ ساھت دو داں چار ءَ زھرشانی کنگ بیت اِنت-

دومی جار ءَ آئی ءَ گوشتگ نیدرلینڈ ءَ بی این ایم ءِ نیمگ ءَ یک اگست ءَ پارلیمنٹ ھاؤس ءِ دیم ءَ ساھت یک ءَ زھرشانی کنگ بیت اِنت –

زیارت ءِ وئیل ءَ پد بلوچستان ءَ سیاسی پھناتاں یک برے پد ءَ برانزی ءِ توارے چست کرتگ ءُ کشوکانی ھلاپ ءَ برانز گپتگ اَنت کہ آیانی گوشگ اِنت پاکستان یکشل ءَ ھمے رنگ ءَ بیگواھیں مردماں کُشگ ءُ دور دیگ ءَ اِنت بلے جھان ءَ تنی وھدی بلوچانی کوشانی ھلاپ ءَ وت ءَ گُنگ ءُ بے توار کتگ –

نی اے آسری نندانک کجام کچ ءَ روت ءُ سر بیت چی آئی ءِ آسر بنت اے آسری ھما تکانی تہ ءَ اِنت کہ اود ءَ ھمشتیں زور ءِ توار آیانی بیگواھیں مردمانی رکینگ ءَ ابید دگہ ھچ کس آیاں دیم ءَ آور نہ کنت-