گوستگیں ماہ ءَ بلوچستان ءِ دمگ ھرنائی ءَ چہ ناشناسیں مردمانی دستءَ بیگواہ بیتگیں کاریز شرکت ءِ منیجر شیر بھادر ءِ جون درگیجگ بیتگ۔
شیر بھادر ءِ جون گوستگیں شپ ءَ بلوچستان ءِ دمگ ھرنائی ءَ دزکپتگ۔
یات بہ بیت کہ ھمے کاریز کمپنی ءِ منیجر ءَ ھوار دگہ سئے کاریز کار گوستگیں جون ءِ 12 ءَ نا ناشناسیں مردماں شپ ءِ نیم ءَ شال ءِ نزیکیں دمگ اسپین کاریز ءَ چہ بیگواہ کُتگ اِت اَت۔
پولیس ءِ ھما وھدءَ گُشگ اَت کہ بیگواہ بیتگیں کارمندانی تہءَ یک انجینئر ءُ سئے کاریزکار ھوار اَنت، بیگواہ بیتگیناں چہ دو مردمانی سیادی گوں چکوال، یکے چہ صوابی ءُ یکے چہ مظفرآباد ءَ بیتگ۔
کاریز ءَ کارکنوکیں کارمندانی بیگواھی ءِ ارزی ھنہ اوڑک تھانہ ءَ نبشتہ کنگ بیتگ اَت۔ بلے بیگواہ ءُ کُشگ بیتگیں کاریز کمپنی ءِ کارمندانی سوب داں انگت زانگ نہ بیتگ اَنت ءُ نانکہ کجام ھم گل ءَ اِشی زمہ واری زرتگ۔