سرجمیں بلوچستان ءَ ھورانی سوب ءَ مزنیں تاوان باری بیتگ، ایمرجنسی جنگ بہ بیت – بلوچ یکجھتی کمیٹی

بلوچ یکجہتی کمیٹی ءَ سرجمیں بلوچستان ءَ ھورانی سوب ءَ بیتگیں تاوانباری ءُ لس مھلوک ءِ بے کس ءُ بے کمک یل بئیگ ءِ جاورھال ءِ سرءَ پدردی درشان کنان ءَ گُشتگ کہ بلوچستان ءَ بشامی ھوراں چہ تاوانباری بیتگ۔ ھور ءُ ھارانی سوب ءَ داں انگت 100ءَ گیش مردم بیران بیتگ وھدیکہ مھلوک ءَ بازیں جانی ءُ مالی تاوان بیتگ، لوگ پُرشتگ اَنت ءُ کِشار تاوانی بیتگ اَنت ءُ ھزارانی کچ ءَ مھلوک بے لوگ بیتگ اَنت۔ ھمک روچی زندمان سک باز سانمند بیتگ ءُ بازیں میتگ آپ ءَ بُرتگ اَنت چریشی ءِ سوب ءَ ھزارانی کچ ءَ مردم لڈگ ءَ لاچار اَنت بلے اے ترندیں تاوانباری ءَ پد ھم مھلوک گوں قدرتی آپتاں گوں یل کنگ بیتگ اَنت۔ درستیں ریاستی مشینری ءَ اے تاوانباری ءِ سرءَ چم بستگ اَنت۔ سرکار ءِ نالائکی ءِ سوب ءَ تاوانانی تہءَ گیشی آیان اِنت۔

جارکش ءَ گُشتگ کہ لسبیلہ، جھل مگسی، کیچ، جھاو ءُ بلوچستان ءِ بازیں ھند ءُ دمگ اے وھدءَ ترندیں ھورانی آماچ اَنت چہ اشاں بازیں دمگ آپ ءَ بُرتگ اَنت، داں انگت سرکارءِ نیمگ 100مردم ءَ گیش ءِ بیرانی ءِ ھال سدک کنگ بیتگ اَنت، وھدیکہ راستیں کساس چہ اِشی ءَ ھم گیشتر اِنت بلے قدرتی آ پتاں گوں دیمپانی کنگ ءُ لس مھلوک ءَ کمک دیگ ءِ وھدءَ سرکاری مشینری سرجم ءَ گار اِنت۔ بلوچستان ءَ گوں نہ تھنا انساپ ءُ دیمروئی ءِ تک ءَ بس ٹھکیں ٹاپار بئیگ ءَ اِنت بلکینہ قدرتی آپتانی وھدءَ ھم ڈالچار کنگ بئیگ ءَ اِنت گشے اِدءَ نشتگیں مھلوک مردم نہ اَنت۔ گوستگیں سال ءَ وھدے مری ءَ ترندیں پرپگورای ءَ مردم پس اِتگ اَنت گُڑءَ سرجمیں ڈیھہ ءِ مشینری ءَ گامگیج زرت ءُ آ مردمانی کَشگ ءُ کمک ءَ رست اَنت بلے بلوچستان ءِ وھدءَ سرجمی ءَ ھاموشی اِنت رسانکدر ءَ ھم سرجم ءَ ھاموشی برجاہ داشتگ۔

جارکش ءَ درشان ءِ گُڈسرءَ گُشتگ کہ بنجاھی سرکار، پرگینگی سرکار ءُ زمہ واریں ادارگاں گوں دزبندی کنیں کہ بلوچستان ءَ اے وھد ءَ ھزارانی کچ ءَ مھلوک ءِ زندمان ھترناکیں جاوراں چہ دوچار اَنت، بازیں ھند ءُ دمگ ھار آماچ بیتگ اَنت ءُ آپ ءَ بُرتگ اَنت اشاں زیت کمک ءِ لوٹ اِنت، بازیں کساس ءَ مردم آپ ءِ تہءَ پس اِتگ اَنت کہ اِشانی کُشگ ءِ زرورت اِنت۔ اگاں اشانی زوت ایمرجنسی بنیات ءَ کمک کنگ مہ بیت گُڑءَ بے کساس مردم گوں جنین ءُ زھگ مرگ آماچ بیت کن اَنت۔