لوگواجہ دیم ءَ آرگ بہ بیت بہ بیت ءُ آئی ءَ انساپ دیگ بہ بیت – لوگ بانک جمیل سرپرہ

شال گورنر کارگس ءِ دیم ءَ زھرشانی نندانک ءَ نشتگیں جمیل احمد سرپرہ ءِ لوگی ءَ وتی لوگواجہ ءِ یل کنگے لوٹ کتگ – آئی ءَ انسانی ھکانی گل ءُ رسانکدراں چی لوٹ کتگ کہ منی توار ءَ ھاکماں سرکنگے ھاتر ءَ منی ءُ منی زھگانی کمک ءَ بہ کن ایت –

بیگواھیں جمیل سرپرہ ءِ لوگ بانک ءَ شال ءِ نندانک ءَ اھوالکاراں گوں تران کنان ءَ گوشتگ کہ جمیل احمد سرپرہ سرکاری کار ءَ بوتگ ءُ گوستگیں بلوچستان ءِ گورنر احمد خان اچکزئی ءِ پی آر او بوتگ کہ بیست ءُ پنچ جولائی ءِ شپ ءَ اے ٹی ایف ءُ ایف سی ءِ کارمنداں گرین ٹاؤن سریاب دگ شال ءَ چہ جندے گس ءَ آوار جتگ ءُ بیگواہ کتگ –

جمیل سرپرہ ءِ لوگبانک ءَ اھوالکاراں گوں تران کنان ءَ گوشتگ کہ لوگواجہ ءِ یل کنائینگے ھاتر ءَ من گوں وتی تپلیں چُکاں ھر جاہ توار چست کتگ بلے منی لوگواجہ ھنگت یل کنگ نہ بوتگ ناکہ آئی ءِ درگت ءَ مارا سرپدی ءِ دیگ بوتگ کہ آ کجام جاورھالانی تہ ءَ انت – آئی ءَ گوشتگ کہ منی ناکو ءُ جمیل احمد سرپرہ ءِ پت عبدالغنی ءَ تاں گڈی ساھت ءَ وتی زھگ ءِ ودار کتگ ءُ اے دنیا یل داتگ –

بیگواھیں جمیل احمد سرپرہ ءِ لوگی ءَ گوشتگ کہ جمیل ءِ مات ءَ ھپت سال انت کہ دروازگ ءِ دپ ءَ نشتگ ءُ وتی زھگے ودار ءَ کنگائیں کہ کدی منی زھگ واتر بیت –

آئی ءَ گوشتگ کہ منی دو زھگ انت من چہ واکداراں لوٹ کناں کہ منی زھگانی سر ءَ رھم بہ کناں ءُ جمیل ءَ یل بہ کناں – زیارت ءِ وئیل ءَ پد ما سک باز تکانسر انت –

آئی ءَ دیمتر ءَ گوشتگ کہ اگاں منی لوگواجہ ءَ گناہ ءِ کتگ گڈا آمیدگس ءَ آرگ بہ بیت ھر سزائے کانود دنت مناں ءُ منی زھگ ءُ آئی ءِ مات ءَ کبول انت بلے مارا ھما ازاب ءِ تہ ءَ دور دیگ بوتگ آئی ءَ چہ مارا بہ رکین ایت مئے گس ءِ وشی ءُ زھگانی پت ءَ مارا بدئیت –

آئی ءَ گوشتگ کہ مروچی شپ ءِ ادار ھپت ءَ بگر تاں دہ ءَ ٹوءیٹر کمپئین ءِ چلائینگ بیت اِنت من درسیں انسان دوستاں لوٹ کناں کہ بھر بہ زور انت ءُ جمیل احمد سرپرہ ءِ ھاتر ءَ توار چست بہ کن انت –