کراچی: بیگواھیں مردمانی ھاتر ءَ زھرشانی برجاہ

سند ءِ مزن شھر کراچی پریس کلب ءِ دیما زورانسری آور جنیانی بگیری ءَ زھرشانی برجاہ، زھرشانی ءَ بیست ءُ یک روچ سرجم بوتگ انت –

بلوچ یکجھتی کمیٹی کراچی ءِ نیمگ ءَ جار ءَ گوشگ بوتگ کہ بی وائی سی کراچی ءِ آرگنائزر آمنہ بلوچ بیگواھیں مردمانی کھول ءِ ھمراھی ءَ شمبے ءِ روچ ءَ پریس کلب ءَ اھوالکاراں گوں تران کنت – کہ زھرشانی بنجلے جوڈیشت ءُ زھرشانی گیش کنگے درگت ءَ اھوالکاراں سرپد کنت ءُ اے پریس کانفرنس سند سرکار نیمگ ءَ بوتگیں گند ءُ نند ءِ درگت ءَ ھم گپ جنگ بیت اِنت –

زانگ بہ بیت ھمے ماہ ءَ آمنہ بلوچ ءِ چیردستی ءَ کراچی ءَ زورانسری آوار جنگ بوتگیں مردمانی کھول ءُ ایس ایس پی ساؤتھ گوم ءَ گند نندے بوتگ ات اے گند ءُ نند ءَ سند ءِ وزیرمیر شبیر بجارانی ھم آیگی بوتگ بلے بژن آئی ءَ بھر نہ زرتگ – بلے پدا ھم آمنہ بلوچ ءَ چہ کراچی ءَ زورانسری آوار جنگ بوتگیں مردمانی لڑ سند پولیس واکدارانی دست ءَ داتگ – آ باور کنائینگ بوتگ انت کہ اے درسیں آوار جنگ بوتگیں مردم یل کنگ بنت ءُ دومی گند ءُ نند دو روچ ءَ پد بیت کہ سند ءِ وزیر میر شبیر بجارانی ھم ھوار بیت بلے ناکہ دومی گند ءُ نند بوتگ ءُ ناکہ بیگواھیں مردم یل کنگ بوتگ انت –