نبشتانک: نمدی یے پہ وتی زند ءِ نمیرانیں ھمسپر ءَ
نبشتہ کار: مجاھد زاھد
دی بلوچستان پوسٹ
منی زند ءِ نمیرانیں ھمسپر،امیت اِنت کہ تو وش ءُ دراہ ءُ زندگی ءِ پُرز لزّت ءُ شادھانی منگیر ءَ بات ئے۔
مھرانی چِراگ،من باز وھد ءَ پد مرچی گوں بازیں یات ءُ زھیراں لوٹ آں کہ پہ تو کاگدے راھی بہ کن آں بلے نہ زان آں کاگد ءِ سر ءَ بہ نویس آں چے؟ من زان آں پہ تو من ھرچی نبشتہ بہ کن آں،بلے تئی دل پہ من موم نہ بیت ءُ تو وتی گلھاں یک گور ءُ پد ءَ واتر پہ من نہ بہ ئے بلے مرچی دل مرّینگ ءَ نہ اِنت،نہ زان آں چی ءَ مدام ھمے سکین ءَ دنت کہ تئی ھال ءَ بہ گِر،پہ تو چیزے بہ نویس ءُ دیم بہ دے،کاگد ءِ سر ءَ لھتے انچیں دانک چہ ند ءِ سْیاھیاں چہ بہ پلگار کہ ھچ دوستار ءَ پہ وتی دوست ءَ نبشتگ نہ کُتگ بلے من چے نبشتہ کُت کن آں؟ من ناں چُشیں ندکارے آں ءُ نیکہ منی کر ءَ پہ تئی واستا چُشیں گوھریں دانک ھست۔ بلے پد ءَ ھم ترا وتی توار ءَ سر کنگ لوٹ آں کہ تو بہ زان ئے،تئی زند ءَ یک موالیں کارستے یک وھدے بیتگ کہ تو زند ءِ چار راھے ءِ سر ءَ آؤرتگ ءُ پہ دائمی گار کُتگ۔
ارواہ، من زان آں تو جیڑے کہ مرچی من ءَ تئی چونیں یاتے ءَ گورجتگ کہ من چُش بے تاھیر آں، ھو سد درسد تو زانگ لوٹ ئے،بلے زان ئے من ءَ پہ وت ءَ بے وپائی ءِ شِگان ھچبر شات نہ بیت، من نہ لوٹ آں کہ باندا روچ تو پد ءَ اے گپ بہ جن ئے کہ من پرچا تئی ھال نہ گِپتگ؟ پرچا پہ تو کلوھے دیم نہ داتگ،ترا گوانک نہ کُتگ! زان ئے،اے مھر ءِ پِڑ انچیں پڑے کہ اد ءَ جِنک ھرچوڑ بُھتام بار بہ بیت بلے وتی بُھتام ءَ نہ من ایت ءُ پد ءَ شگان ءَ دائم ءَ پہ وتی دوستار ءَ بچک ءَ ایر کنت بلے من گُش آں اے رندی من بُھتام بار مہ بہ آں۔
جان ء من،زندگی ستر وش بہ بیت،توری یکے ءَ زندمان ءِ دُراھیں وشی بہ رس اَنت بلے بے وتی دوست ءَ ھچبر زند سرجم بوت نہ کنت،ھمے پیم ءَ اینچوک وشی ءُ شادانی ءَ چہ پد گُش ئے منی زند انگت نا سرجم اِنت۔گندئے یکے تھاریں کوٹی ءِ تہ ءَ بند بہ بیت ءُ پرائی ءَ درکپگ ءَ ھچ راہ ءُ در پشت مہ کپ ایت،بابید ء یکیں وتی پاھو دیگ ءَ؟ ھھھھھ! پریشان مہ بو من وت ءَ پاھو نہ دے آں بلے باور کن زند نیستی ھساب ءَ اِنت۔ من باز جھد کُتگ ءُ انگت کنگ ءَ آں کہ ترا چہ وت ءَ بے ھیال بہ کن آں ءُ تئی ھچ یات ھم تُشے مئیت بلے بژن کہ بے ھیال کنگ ءُ یکے ءَ چہ وتی زھن ءَ کشگ کسی وتی دستی کارے نہ اِنت،اگاں اے وڑ بوتیں من ترا دیری شموشتگ اَت پرچاکہ تئی یات ءُ وشیں کندگانی زھیرانی آیگ ءَ پد من ھچ آرام بوت نہ کن آں ءُ چمانی ارس ھچ بند نہ بنت۔نو تو بہ گوش من بہ کن آں چے؟ برے برے دل ءَ جیڑان ءُ ھدا ءَ سک میاریگ کن آں،باریں چینچوک گناہ کٹ اِتگ پہ وت ءَ ھمے سلیں پگر ءُ ھیالانی دارگ ءَ بلے من ءَ میار نیست، ھدا ءَ باید اِنت اے چیز چہ دُرست ھمود ءَ چہ نبشتگ بہ کُتیناں،ھرکس کہ ھمائی بھت ءُ دست ءِ لکیران اَت،ھما ھمائی ءَ بہ بوتینیں ءُ دگہ پرائی ءِ مھراں ھچ تُنّیگ مہ بوتیں۔نوں گرک اِنت مردم دگہ دیمے روگ ءَ اِنت،ملایے پاد کیت ءُ مۓ جند ءَ کُش ایت،ھاھاھاھا-
شرنگیں گل،ترا منی بلے تُشے یات ھم نئیت گندئے؟ ھو اگا ناں یکروچے وَ الم ھال پُرسی یے کُتگ اَت کہ باریں اے گنوک مرتگ اگاں زندگ اِنت،، من ھیران آں ترا چون اِنت،چونیں گِلگداری یے زُرتگ ءُ نشتگ ئے،کھروار! زالم من باز دیستگ بلے تئی وڑیں سنگدل جھان ءَ نیست باور کن۔اڑے او بے وپا! تو سرپد ئے ترا چہ پد من وتی میتگ ءِ رنگ نہ دیستگ؟من میتگ ھم وتی یل کُت پرچاکہ میتگ ءَ تئی بازیں یاتے گوں بندوک اَت من میتگ ءَ گیش جل اِت نہ کُت۔من ءَ انگت ھما وتی گُّڈی روچ وتی میتگ ءِ یات اِنت کہ من میتگ ءِ جھل دیمی بُرزگے ءِ سر ءَ روزردے ءِ وھدے ءَ نشتگ اِت آں،آ روزرد ءِ وھد ءِ کسہ نہ کن آں شرتِر اِنت پرچاکہ آ روزرد منی زند ءِ اول رند بیتگ کہ چمانی ارس در اَتکگ اَنت،آ روزرد ءَ گوں تئی یاتاں من ءَ ءُ منی میتگ ءَ ھوار یک انچیں ملوری ءَ مانپوش اِتگ اَت کہ چے بہ گوش آں!من چما روچ ءَ میتگ یل کُت ءُ اتک آں وت ءَ تئ شھر ءِ باھوٹ کُت۔
بکش یار من کہ گپ ءَ لگ آں نہ زان آں چہ کُجا بندات کُتگ ءُ کُجا آسر بہ کنان ئِے،او راستے، اگاں دوبر منی میتگ ءَ تئی سر کپت،سِنگ ءُ ڈوگ ءُ وشبویں پلکاں سلام کن میتگ ءِ ،من نوں ترا آ میتگ ءَ دوچار کپت نہ کن آں۔
زندگی وش ءُ وژدلی بہ گوزات،جمبر ءُ ساچان مُدام تی سر ءَ بات اَنت،مود ءِ ٹالے ءَ تئی شالا پرواہ مہ بات۔۔
تئی مھر ءِ گُڈی گنوک: مجاھد زاھد
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔