شال پریس کلب ءِ دیما جتگیں وائس فار بلوچ مِسنگ پرسنز ءِ زھرشانی بنجل ءَ 4688 روچ سرجم بیتگ اَنت، مروچی یکجاھی درشان کنوکانی تہءَ پی ٹی ایم ءِ رھشون آغا زبیر شاہ، جلال خان کاکڑ، نور آغا ءُ دگہ ھوار بیتگ اَنت۔
اے درگت ءَ وی بی ایم پی ءِ وائس چیئرمین ماما قدیر بلوچ ءَ گُشتگ کہ پاکستانی ریاست ءِ نیمگ ءَ زورانسری بیگواھیانی ءُ بلوچ نسل کشی ءِ تہءَ گیشی آرگ بیتگ، چہ کراچی ءَ زورانسری بیگواھیں بلوچ مردمانی ءِ کھول گوستگیں شش روچاں چہ کراچی پریس کلب ءِ دیما یکشل ءَ زھرشانی کنگ ءَ اَنت، آھانی زھرشانی مدامی رنگ ءَ پرنٹ ءُ الیکڑانک رسانکدر ءِ نیمگ ءَ چہ ڈالچار کنگ بئیگ ءَ اِنت، آھانی دوستیگیں مردم پی پی پی ءِ سند سرکار ءِ کمک ءَ گوں سند رینجرز، سی ٹی ڈی ءُ چیریں ادارگاں چِست کُتگ ءُ بیگواہ کُتگ اَنت، کھولانی یک رھبندی لوٹ اِنت کہ آھانی دوستیگیں مردم دیما آرگ بہ بنت، کراچی ءِ جتاھیں ھندانی تہءَ زورانسری بیگواھیانی تہءَ گیشی گندگ ءَ اَتکگ۔
آئی ءَ گیشتر گُشتگ کہ شال ءَ چہ گوستگیں روچاں بیگواہ بیتگیں چار نودربرانی کھول سک گمیگ اَنت، آھانی یل کنگ ءِ ھاترءَ برجاھیں کمپین آنی بھر زیرگ بہ بیت ءُ درستیں بلوچانی زورانسری بیگواھی ءُ آھانی یل کنگ ءِ ھاترءَ کھول ءِ ھمراھداری کنگ بہ بیت۔
آئی ءَ گُشتگ کہ انسانی ھقانی پانکجنوکیں میان اُستمانی گل ءُ رسانک گِسانی بلوچانی زورانسری بیگواھی ءُ بلوچستان ءَ انسانی ھقانی ترندیں پادمالیانی درگت ءَ سرپد اَنت، آھاں وتی کرد پیلو کنگ لوٹیت، بلے اپسوزیگ گپ اِش اِنت کہ درستاں اے درگت ءَ وتی دپ بستگ اَنت، مئے مات، گھار ءُ زھگ دانکہ دگانی سرءَ لٹ کُٹ کنگ مہ بنت تاں ھما وھدءَ مئے ھال ھم شنگ نہ بنت ما رسانکدرانی درستیں ملکی ءُ درملکی ادارگاں ءُ گوں انسانی ھقانی گلاں یک برے پدءَ دزبندی کنیں کہ آ وتی جرمکاریں ھاموشی ءَ بہ پروش اَنت ءُ بلوچستان ءُ کراچی ءَ بیتگیں زورانسری یگواھیانی بگیر ءَ مئے توار جوڑ بہ بنت ءُ مئے پرایمنیں زھرشانی ءَ جھانے دیما ایرکنگ ءَ مئے کمک ءَ بہ کن اَنت۔