بلوچ نیشنل موومنٹ ءَ وتی شنگ کتگین درشان ءِ تہ ءَ گوشتگ بی این ایم ءِ نیدرلینڈ تک ءِ نیمگ ءَ 26 جون ءَ یک شمبے ءِ روچ ءَ آزار دیستگیں مردمانی پلہ مرزی ءِ میان استمانی روچ ءُ نشہ ءُ آئی ءِ شپکی ءِ بگیری ءِ میان استمانی روچ ءَ نیدرلینڈز ءِ شھر امسٹرڈم ءِ ڈام اسکوائر ءَ زھرشانی کنگ بیتگ۔
زھرشانی کنوکاں جرنبشت، تاک ءُ پہ زور بیگواہ کرتگیں مردمانی اکس گون بیتگ اَنت ءُ پاکستان ءِ زوراکی ءِ بگیری ءَ اوگام جتگ۔
امسٹرڈم نیدرلینڈز ءَ گوں زھرشانی کنوکاں بی این ایم نیدرلینڈز تک ءِ باسک ءُ پانک ءِ رسانکدری رھوتدار جمال ءَ تْران کرتگ۔
آئی ءَ گْوشتگ کہ پاکستان ءَ پہ توپک ءِ زور ءَ مئے گلزمین دستیگ کرتگ بلے بلوچ راج ءَ پاکستانی زورگری ءِ بگیری ءَ چہ بندات ءَ جھد بنا کرتگ کہ داں مروچی برجاہ اِنت پاکستان پہ بلوچ زْرمبشت ءِ لپاشگ ءَ چکچینی ءِ پجیگ ءَ دگہ میار کنگ ءَ اِنت۔
آئی ءَ گْوشتگ کہ زھرشانی ءِ مول ھمیش اِنت کہ ما جھان ءَ بلوچستان ءِ مردمانی سر ءَ بیوکیں زوراکیانی بارہ ءَ سرپدی بہ دئے ایں بلوچانی گھگیری ءَ پاکستان ءِ اے ٹاپار رد کرتگ کہ بلوچ راج پہ وشی گوں پاکستان ءَ ھوار بیتگ اے جنگ ءُ گھگیری داں مروچی برجاہ اِنت اے گھگیری ءِ دیم ءِ دارگ ءَ بلوچ پہ زور بیگواہ کنگ بیگ ءُ ناراھیں رنگے ءَ کشگ بیگ ءَ اَنت۔