نبشتانک : ودار
نبشتہ کار: نودان بلوچ
دی بلوچستان پوسٹ
روزرد ءِ وھد ات روچ وتی بانزُلاں نزّ آران اَت جِنگُول چِرّی چِرّی کناں اِت انت وتی کُدّواں روگ ءَ اِت انت ءُ شپ وتی سیاھیں چادرا ماں گیدی ءِ دلبند ءَ مانّ پُوشگ ءَ ات من گِدان ءِ دپ ءَ وتی تھتّ ءِ سر ءَ نشتگ اِت اَنت ءُ مات گِدان ءِ تہ ءَ گوں نسرین ءَ گپّ ات کہ مرید ءِ بیگوائی ءَ ھپتّ سال سرجم اِنت کہ ھچّ ھالے نیست من دراھیں میر ءُ وزیرانی درّ ٹُک اتگ اَنت پہ وتی چُک ءِ واست ءَ دُرستاں من ءَ تّسلہ ءَ داتگ کہ تئی چُک ءَ ما درکنائیں اِیں بلئے! روچ ءِ مروچی ءَ منی چّک ءِ انگت ھچّ ھال نیست من نزاناں نِی کئی گْورا برو آں ءُ کئی درا بُہ ٹُکّاں من نو دمبُرتگ آں چِد ءُ گِیشّ ودار کُت نہ کن آں اے ھپتیں سالانی گیرانیں ودار ءَ من ءَ پیر کُرتگ من بس مَرگ ءَ چہ پیش یکبرے وتی چُک ءَ گندگ لوٹاں-
نسرین ءَ درائیت، منی مات اے میر ءُ وزیراں چُشیں کول ءُ کرار بازیں مات ءِ گون ءَ کُتگ بس ھُشکیں کرّار بوتگ اَنت اے بس ھما دمان ءَ مردم ءِ دیم گوش انت کہ ما شُمئے مردماں درکنائیں ایں ایشاں ھچّ گار ءُ بیگوائیں مردمانی کھولانی گم نہ اِنت ایشاں اگاں چُشیں گم پرّ بوتیں گُڑا مرچی شال ءُ کراچی ءِ پریس کلب ئے دیم ءَ کس نہ نشتگ ات ءُ پریات اش نہ کُرتگ ات پہ وتی چُک ءُ براتانی واست ءَ منی مات اے وت بےوس انت ایشانی گپّاں اود ءَ کس گوشداریت اے پہ چارکلدار ءَ بھا بوتگ آں پہ چرپیں دپارے ءَ ھمیشانی پُشت ءَ تچگ ءَ انت چو کُچک ءَ لٹّیک سُریناں انت-
من مات ءُ نسرین ءِ گپّ آں گُوشدارگ ءَ ات اَں کہ مات ازگمّگ ءُ گپّ کنگ ءَ اَت ءُ منی چم اوں پِیاپ ات اَں کہ مرید ءِ چُک پاتول چہ لوگ ءَ دراتک ءُ منی گْور ءَ اتک ءُ سرئِے منی کونڈ ءِ سر ءَ ایر کُت ءُ وپت بلے پاتول بے موڑ ات ھچّ گپّ کنگ ءَ نہ ات پاتول تو مرچی ھاموشے ھچّ نہ گُش ئے جان ءَ وشے بلکیں ترا یکے ءَ مِیڑ اِتگ گوں؟ من جُست کُت، من جھُد کُت کہ پاتول گپّ بہ کنت دانکہ من گوں آئی ءَ دلگوش بہ باں بلِے! پاتول ءَ منی ھچّ ءِ پسّو نہ دات ءُ وتی جُست اش ایر کُت۔
لالا اِبّا کُجا اِنت پرچا گسّ ءَ نئیت ایں تو ھرّوچ گْوش ئے کیت ایں گُڑا چی ءَ انگت نئیت اِنت من ءَ پہ ابّا زھیر کنگ ءَ اِنت؟-
من نہ زانت کہ پاتول ءَ کُجام پسّو ءَ بہ دیاں ءُ چوں رازے بہ کن آں، پرچا کہ من وت چو پاتول ءِ وڑا مُرید ءِ گَم ءُ یاتاں گوں مانگیش اتگ ات اَں-
من دراجیں ساھے کشّ اِیت ءُ درّائیت، پاتول جان تئی پتّ دری ملکان اِیں دل ءِ لوٹ ایت کہ بیا آں شُمارا بچاراں بلے تئی پتّ ءَ مُکل رسگ ءَ نہ اِنت تئی پتّ ءَ مُکل بہ رس ایت کیت شُمئے چارگ ءَ –
پاتول! اِبّا ءَ زان ءَ مئے یات نیاھاں کہ ھنچو دیراں نشتگ منی واست ءَ لیبوک ھم دیم نہ دنت رُکسانہ ءِ پتّ ھم ڈنّ ءَ اِنت ھر وھد ءَ رُکسانہ ءِ واست ءَ لیبوک دیم دنت اِبّا چیا پہ من دیم نہ دنت؟ لالا اگاں اِبّا پون کنت بگُشے پہ تئی ءَ گوشتگ پہ منی واست ءَ لبیوک راہ بدے ئے –
شرّیں پاتول جان من گْوشاں تئی پتّ ءَ بلے پہ تو بڈّے لیبوک دیم دنت تو نو برو لوگ ءَ مات ئے کرّا پہ تئی روگ ءَ پد من گوں وت ءَ جیڑ ات کہ پہ تئی ءَ من چوں بگُش آں کہ تئی پتّ دری ملکاں نہ اِنت بلکیں ملک ءِ زوراکیں ریاست ءِ دست ءَ اِنت ءُ تھاریں زندان ءَ اِنت باریں کُجام ھزابیں زند ءِ تَہ ءَ زندگی کنگ ءَ اِنت یا کہ اے زالمیں ھون واریں رسترانی دست ءَ چو اے دگرانی وڑا تیرانی آماچ کنگ بوتگ ءُ جون اش ماں پٹّ ءُ گیابانے ءَ چو بہ کس ءَ دور دیگ بوتگ یا انگت بندیگ اِنت-
من چوں پہ تئی اُمیت ءُ دل ءِ داشتگیں دراھیں ارمانانی گُٹ گیری ءَ بہ کن آں کہ آئی ءَ پہ وتی پتّ ءِ آیگ ءِ ودار ءَ دل ءَ داشتگ انت ءُ باریں دگہ چُنت چُک چو پہ تئی ءِ وڑا پہ پتّی مھرے ءَ تلوسگ ءَ اَنت ءُ بازینے اے زالماں چورو کُتگ پہ پتّی مھراں بے مھر بوتگ انت لھتے چو مھلب ءُ علی ھیدر ءِ وڑا پہ وتی پتّ ءِ شوھازگ ءَ دگانی سر ءَ رُستگ ءُ مزن بوتگ انت ءُ انگت پہ وتی پتان رھچاری انت ءُ دگہ باریں چُنت مات چو زاکر مجید ءِ مات ءِ وڑا گوں تُنگیں چماں پہ وتی تاسوکیں بچّاں وداریگ انت ءُ چمے اش ماں راھانی سر ءَ کُل انت بلکیں مرچی یا باندا مئے چُک آجو بیت ءُ اے ودارانی گرانیں سھت چہ مئے کُوپگ ءَ دور کیت ایں-
پہ تئی تھنا تو نہ اِت نیکہ تھنا مئے ماتیں پہ وتی بچّا وداریگیں بلکیں مرچی بلوچستان ءِ ھر ھندّ ءُ جاہ ءَ اے زالمیں بے ھُدا آں ماتانی سالوکیں بچّ آوارجتگ ءُ مات پہ آھاں وداریگ اَنت ءُ لھتے گوں ودار ءِ دردناکیں تورشتاں چے کُنڈائین دگنیا چہ شُتگ اَنت-
من بلوچ مات ءُ گوھارانی کُجا درد ءِ کسھاں بہ کن آں اے درداں کئے مار ات کنت؟ اے ھما درداں نہ لبزان گوں بھاں کنگ بنت نیکہ لبزان گوں نبشتہ بنت ایشان ھما کس مار ات کنت کہ آئی ءِ سر ءَ گوستگ انت یا و گوزگ ءَ انت انچُش کہ مرچی ھمے دردناکیں سھتانی توک ءَ مئے مات ھم گوزگ ءَ اِنت پہ مُرید ءِ ھاتر ءَ کہ ھروچ پہ آئی ءَ راھچاری اَنت-
مُرید نو بیا کہ بے تو اے گسّ ابیتک اِنت ءُ مات ھم تئی دور ئِے گرانیں گماں وتی نزوریں کُوپگاں نو زرت کنگ ءَ نہ اِنت پہ تئی ھم نو رُستگ ءُ مزنیں دائمی تئی اکس ءَ چار ایت ءُ تئی جُست ءَ کنت کہ ابّا کُجا اِنت من چنچو روچ ءَ پاتول ءَ پہ دُروگیں تسلہ گلا آں ءُ مرچیگ ءُ باندات ءِ دوار ئےدیاں نو من ھم دمبُرتگ پہ دروگیں تسلہ تو واتر کن کہ مات ءُ پاتول پہ تو وداریگاں-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔