کیچ: بند ءُ ساچی کمپنی ءِ سر ءَ اُرش، دو پوریاگر بیران

بلوچستان ءِ دمگ کیچ ءَ مروچی سھب ءَ پیش اتکگیں یک تیرگواری وئیلے ءَ دو پوریاگر بیران بیتگ اَنت-

تیرگواری ءِ وئیل کیچ ءِ دمگ ھوشاپ ءَ پیش اتکگ – دمگی مردمانی رد ءَ پوریاگر یک دگے ءِ بند ءُ ساچی ءَ کار ءَ گوں دزبند بیتگ اَنت کہ مروچی سھب ءَ آیانی سر ءَ اُرش بیتگ-

اُرش ءَ دو مردم بیران ءُ دگہ زدگ بیتگ اَنت – بلے تنی وھدی واکدارانی نیمگ ءَ اشی ءِ راستی ءُ رد کنگ ءِ گپ دیم ءَ نیتکگ اَنت-

زانگ بہ بیت سَے روچ ءَ پیش ھرنائی ءَ بند ءُ ساچی کمپنی ءِ سر ءَ تیرگواری ءَ اود ءَ مزدور بیران ءُ زدگ بیتگ اِت اَنت-

داں انگت ءَ بند ءُ ساچی کمپنیانی سر ءَ بوتگیں اُرشانی زمہ واری کس ءَ پہ وت نہ زرتگ اَنت-