لورلائی میڈیکل کالج ءِ نودربراں وتی لوٹانی ھک ءَ بنجلے برجم داشتگ

لورلائی میڈیکل کالج ءِ جنک ءُ بچکیں نودربراں شھدربرجاہ ءَ آسراتی نہ دیگ ءُ نودربراں جیڑھانی دیمپانی کنگے سوب ءَ شھدربرجاہ ءِ دیم ءَ بنجلے برجم داشتگ ءُ نندانک جتگ –

لورلائی میڈیکل کالج ءِ جنک ءُ بچکیں نودربر وتی لوٹانی ھک ءَ زھرشانی کنگ ءَ انت – گوستگیں روچ ءَ نودربراں لورلائی بازار ءِ بنجاھی دگ بند کتگ زھرشانی کتگ – میڈیکل نودربراں لوٹ کتگ کہ ایل ایم سی کالج ءِ پرنسپل بدل کنگ بہ بیت ءُ شھددربرجاہ ءِ تہ ءَ نودربراں ھاسٹل ءُ دگہ آسراتی دیگ بہ بنت –

زھرشانی ءَ نندوکیں نودربرانی گوشگ انت کہ بلوچستان ءِ نودربرانی کسمت دگانی سر ءَ نندگ زھرشانی کنگ انت – پرنسپل ھمیچو تاکتور انت کہ آئی ءَ ھچ چیزے پرواہ نیست – اشی ءَ ابید ھما نودربر کہ وتی لوٹانی ھک ءَ زھرشانی کنگ ءَ انت ترسینگ بوھگ انت آھاں بیھار دیگ بوھگ ءَ انت –

زھرشانی کنوکانی گوشگ ات کہ ایل ایم سی ءِ پرنسپل ءُ اسٹاپ ءِ نودربرانی گوم ءَ رویش شر نہ انت کہ اے زانت دژمنی برابر ءَ کئیت – اے وڈیں مردماں مزنیں اگدھانی سرا کنگ سرجمی زانشتی نزام ءِ درگان درگان کنگ انت –

نودربرانی گوشگ ات کہ ما چہ سوبائی سرکار ءَ لوٹ کنیں کہ ایل ایم سی کالج ءِ پرنسپل بدل کنگ بہ بیت ءُ نودربراں بنکی ھک دیگ بہ بنت –