شال ءَ زورگریں پاکستانی پوج سر ءَ بوتگیں اُرشانی زمہ واری بی ایل اے ءَ منّ اِتگ اَنت

بلوچ لبریشن آرمی ءِ جارکش جیئند بلوچ ءَ وتی شنگ کتگیں درشان ءِ تہ ءَ گْوشتگ کہ مئے سرمچاراں گوستگیں شپ ءَ شال ءَ ولی تنگی ڈیم سر ءَ زورگریں پاکستانی پوج کارمرز یک نندانکیں گِس ءُ دو پھازوکی چیک پوسٹانی سر ءَ یکیں وھد ءَ اُرش کتگ ءُ دُژمن تاوانانی دیمپان کتگ-

جارکش ءَ دیمتر ءَ گْوشتگ کہ سرمچارانی سِی ملٹ ءَ گیش برجاھیں اے اُرش ءَ وتکار ءُ گوں راکٹاں دُژمنیں پوج نشانگ کتگ، چریشی ءِ آسر ءَ بازیں کارندھے مرتگ ءُ ٹپی بوتگ اَنت-

بلوچ سرمچار اُرش ءَ پد پہ سلامتی وتی مُھریں اوتاکاں سر بوگ ءَ سوبمند بوتگ اَنت- چریشی ءَ پد پروش وارتگیں زورگریں پوج ءِ بالگرد ھمے دمگ ءَ وتی مرتگیں ءُ ٹپی بوتگیں کارندھانی چست کنگ ءَ سر بوتگ اَنت ءُ بالگرداں نزیک ءَ ھستیں میتگانی سر ءَ سر ءُ دیم بمبگواری کتگ ءُ میتگ مردم تاوان داتگ اَنت-

بلوچ لبریشن آرمی ءِ سرمچاراں دہ جون آدینگ روچ ءَ ھرنائی ءِ دمگ شاھرگ ءَ زردآلو ءِ ھند ءَ زورگریں پوج ءِ یک چیک پوسٹے سر ءَ گوں مزنیں سلاھاں نشانگ کتگ ءُ دُژمنیں پوج ءُ جانی ءُ مالی تاوان چست کنگ کپتگ-

جارکش ءَ دیمتر ءَ وتی درشان ءِ تہ ءَ گْوشتگ کہ ھمے یکیں روچ ءَ مستونگ ءَ میجر چوک نزیک ءَ بی ایل اے ءِ سرمچاراں دُژمنیں پوج ءِ یک چیک پوسٹے ءِ سر ءَ دست بمب اُرشے کتگ- چریشی ءِ آسر ءَ دُژمنیں پوج ءَ جانی تاوان رستگ – بلے پروش وارتگیں دُژمن ءَ دمگ انگر ءَ کتگ ءُ وتی تاوانانی چیر دیگ ءِ جُھد کتگ-

بلوچ لبریشن آرمی چہ بلوچستان دُژمنیں پوج ءِ سرجمی ءَ دراھگ ءَ تاں وتی تُرندیں اُرشاں برجاہ دار اِیت-