نبشتانک: وٹس ایپی بلوچی وانگجاہ؟
نبشتہ کار : بیبرگ بلوچ
دی بلوچستان پوسٹ
وھدے کہ ما بلوچی ءِ وٹس ایپی وانگجاھے ءَ باسکی زُور ایں گُڑا چہ دْرُستاں پیش مارا اے پھمگ لوٹ ایت کہ اِے بلوچی وٹس ایپی وانگجاھانی مول ءُ مُراد چے اَنت؟ ءُ ما زاناں چے ءَ ماں اے گل ءَ ھوار بیتگ ایں؟ زاناں ما وتی وھد ءَ وَ زیان نہ کنگ ءَ ایں؟ چہ سرجمیں بلوچستان ءَ ھوار دُنیا ءِ کُنڈ کُنڈ ءِ بلوچ ماں اِے وٹس ایپی وانگجاھاں چے ءَ ھوار اَنت؟ بزاں داں وھدے کہ ما اِے وڑیں جُستانی جواباں مہ زان ایں گُڑا بزاں ما ھما تبک ءِ ابدالیں نودربر ایں کہ ھر چکاس ءَ بے سوب اِنت۔ مارا تچک بوگ لوٹ ایت کہ بلوچ راج یک گُلامیں راجے، گِند ئے گُلامیں بلوچ راج ءَ آئی ءِ زُبان ماں وانگجاھاں وانینگ نہ بیت۔ چے ءَ کہ اگاں یک گُلامے وتی راجی زُبان ءَ بوان ایت گُڑا آ راج ءِ مھلوک زُبان دوست ءُ راجدوستے جوڑ بنت ءُ راجدوستیں مھلوک گُلامی وَ نہ منّ ایت چمیشکا مئے راجی زُبان ھم ناں کہ تھنا بے آسراتی اِنت بلکیں لگتمالی ءِ ھم دیمپان اِنت۔ گِند ئے یک نیمگے ءَ ماں ٹَوک ءُ توار ءَ بلوچی ءِ زگریں گال ڈالچار بیگ ءَ اَنت دومی نیمگ ءَ لھتیں رَدیں نبشتہ کار بلوچی ءِ کْوھن ءُ زگریں گالانی جاہ ءَ ھِندی ءُ پارسی ءِ گالاں کارمرز کنگ ءَ اَنت۔ بژن اِنت کہ لھتیں بلوچ کہ آیاں چہ یونیورسٹیاں دربُرتگ بلے انگت وتی ماتی ءُ راجی زُبان ءِ وانگ ءُ نبشتہ کنگ ءَ زبھر اَنت۔ البت یونیسکو گْوش ایت “دنیا ءِ بے سوتّیں(جاھلیں) مردُم ھما اِنت کہ وتی جِند ءِ راجی ءُ ماتی زُبان ءَ ونت ءُ نبشتہ کُت مہ کنت”-
بزاں تو توری چہ یونیورسٹی یے ءَ ایم اے انگلیش بہ کن ئے، توری پی ایچ ڈی بہ کن ئے یا توری انجینئرنگ بہ کن ئے بزاں بے وتی ماتی ءُ راجی زُبان ءِ وانگ ءُ راست نبیسّگ ءَ تو جاھلے ئے۔ وتی راجی زُبان ءُ پجّار ءَ ڈالچار کنگ ءُ زورگریں زُبان ءِ وانگ ءُ دربرگ کُجام ھساب ءَ زانتکاری اِنت؟ اگاں ما بلوچ لوٹ ایں کہ دُنیا ءِ دگہ زبانانی وڑ ءَ مئے راجی زُبان بلوچی ھم دیمروئی بہ کنت یا ما لوٹ ایں کہ مئے راجی زُبان گار مہ بیت گُڑا مارا منّگ لوٹ ایت کہ مئے بانُک ءُ واجھانی اولی راجی زمہ واری ھمیش اِنت کہ ما وتی راجی زُبان ءِ درونتاں وانان ءَ بلوچی نبشتہ دربر ایں، مارا وتی راجی زُبان وانگ ءُ راست نبیسّی ھیل کنگی اِنت۔ بلکیں مارا ھر یکے ءَ وٹس ایپی وانگجاہ اڈ کنگ ءُ وتی سنگت، دزگْوھار ءُ سْیاد وانینگی اِنت۔ گِند ئے اگاں ما بلوچی وانینگ ءِ جُھد ءَ بہ کن ایں گُڑا ما دربر ایں ءُ چوناھا بلوچی ھما وھد ءَ دیمروئی کنت وھدے کہ ما دْراہ بلوچی وانینگ ءِ جُھد بہ کن ایں، بزاں نی مارا ھر ھال ءَ زُبان دوست ءُ راجی زُبان ءِ اُستاد جوڑ بیگی اِنت۔
گْوش اَنت کہ یک روچ ءِ تہ ءَ پکیر مُلا جوڑ نہ بیت گُڑا ما گوں شما دزبندی کن ایں کہ بلوچی مئے وتی جِند ءِ زُبان اِنت پمیشکا بلوچی وانگ ءُ نبشتہ ئِے دربرگ پہ بلوچ ءَ سک آسان اِنت گُڑا باید اِنت ما تھنا اشتاپ مہ کن ایں بلکیں اِے جھلی کاراں رِد ءِ سر ءَ بہ کن ایں-
1- اول کسانیں بلوچی درونتاں بہ وان ءُ پد ءَ وت ھمے وڑیں کسانیں درونتاں ھیل (پریکٹس) کن، بزاں وت کسانیں درونتاں نبشتہ ءُ تیار کن ایں۔
2- رَند ءَ کسان کسانیں نبشتانک ءُ آزمانکاں نبشتہ بہ کن ایں۔
3- وتی نبشتگیں گالرِد(جملہ) ءُ نبشتگیں نبشتانکاں دو رند ءَ چمشانک دیان ءَ وت راست بہ کن ایں ءُ درگرانی نبشتھاں ھم راست بہ کن ایں۔
وھدے کہ ما اے سے ئیں کاراں ھیل کن ایں گُڑا ما وت دربر ایں بلکیں ما دْراہ راجی زُبان ءِ اُستاد جوڑ بہ بَہ ایں۔ بزاں اے پیسبوکی بلوچی گل، تاکدیم ءُ وٹس ایپی بلوچی وانگجاھانی مول ءُ مُراد ھمیش اِنت کہ ما دْراہ زیت بلوچی وت دربر ایں ءُ گُڑا وتی سْیاد ءُ لوگ ءِ مردماں بلوچی بوانین ایں ناں کہ بے بھر ءَ ھوار بہ ایں۔ مارا تھنا بلوچی وت دربرگی نہ اِنت بلکیں راج ھم وانینگی اِنت ءُ اِے مئے دْراھیں نودربرانی زمہ واری اِنت کہ گیشتر بلوچی وٹس ایپی وانگجاھاں اڈ کنان ءَ وتی راج ءِ مھلوک ءَ بلوچی وانگ ءُ دربرگ ءِ سکین بدے ایں۔ راج ءَ موبائلانی تہ ءَ بلوچی کیبورڈ ءُ بلوچی ڈکشنری ءِ ایرگیجگ ءُ کارمرز کنگ ءِ سرپدی بہ دے ایں۔ بلوچی درونت ءُ دربرگی تامُراں(Learning Videos) ھورت چار ایں ءُ دیم ءَ ھم روان بہ کن ایں کہ ھر بلوچے ءَ وتی راجی زُبان ءِ وانگ ءُ دربرگ ءِ موہ بہ رس ایت۔
بلوچی مئے وتی شھدیں زُبان ءُ بلوچ راج ءِ پجّار اِنت۔ بلوچ شالا یکمُشت بات اَنت ءُ بلوچی شالا دیمروئی بہ کنات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔