ھدا تو گندگ ءَ ئے ؟
شائر: کادر ھسرت
دی بلوچستان پوسٹ
مئے ماتانی جگر ھون اَنت
گْوھار زندان ءَ بندیگ اَنت
ترا بلکیں یزیداں بھا زرتگ!
یک نگاھے بچار تو بلوچاں
بہ جیڑ ساھتے پہ بلوچاں
کہ کجام ھال ءَ سر اَنت بلوچ
چِنکدر بزگ اَنت تئی زمین ءَ
شال بہ بیت یا بہ بیت کیچ
مانا یک انت پہ بلوچاں
چاریں گْور ءَ زھر شانی اِنت
بیگواہ اَنت مئے گْوھار چہ گساں
ھچ ھال نیست اِنت کجا اَنت
تو شر زان ئے کجام ھال ءَ اَنت
مئے ماتانی چم کور اَنت
زھگانی گماں پت نزور اَنت
زی نورجان اَت مرچی ھبیبہ
داں کد گار ءُ بیگواھی ءِ آس
روک بیت پُلیں بلوچستان ءَ
داں کد گریو اَنت مات پہ زھگاں
داں کد راہ ءَ چار اَنت لاڈکیں گْوھار
اَے ھدا رھم کن، اَے ھدا رھم کن
چی ءَ گوش نہ دار ئے دوایاں ؟
نہ مارے پرچی ءَ درداں بلوچانی؟
ھدا مئے چے گناہ ءُ چے میار اِنت؟