بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ شش سد ءُ پنجاہ ءُ سَے روچ سرجم بوتگ انت – مستونگ ءَ چہ سیاسی ءُ چاگردی باسک محمد یوسف بلوچ، محمد یونس بلوچ ءُ دگہ مردماں بنجل ءَ اتکگ ءُ ماما قدیر گوم ءَ یکجھتی درشانتگ -.
بنجل ءَ اتکگیں مردمانی میان ءَ ماما قدیر بلوچ ءَ وتی ھیال درشانتگ ءُ گوشتگ کہ وھدیکہ راج پاکستان ءِ ھنر ھیلھی مزاکرات مہ منیت ءُ وتی پرایمنیں جھد ءَ برجاہ بہ داریت گڈا اے رندی ترکی ءِ نیمگ ءَ چہ رستگیں ڈرون بلوچ مھلوک ءِ سر ءَ آس دیگ بنت ءُ کشت کوش ءُ وتی کبزہ سیاسی جواز دیگ لٹ پُل ءِ برجاہ دارگ بیت – بلوچستان ءِ تہ ءَ وتگڑیں راجدوستانی یک ٹولی وزارت ءِ سیٹانی ھاتر ءَ ریس ءِ بوھگ انت نوکیں پدریچ ءَ زانت ءُ زانشت ءِ دیگ بدل ءَ وتی مپاداتی ھاتر ءَ کارمرز کنگ انت –
ماما قدیر بلوچ ءَ گوشتگ کہ بلوچ پرایمنیں جھد ءَ زورگیرانی مزاکرات ءِ ھنر ھیلھاں بیا انت جھد چہ دسکش بہ بیت ءُ دومی نیمگ ءَ پرایمنیں جھد ءِ ایرموش کنگ ءَ ریاست وڈ وڈا بلوچ سر ءَ زوراکی انت – بنداتی روچاں بلوچ سیاسی باسک ءُ ھمدرد چیریں ادارھاں آوار جتگ ءُ ترسینتگ ءُ یل کتگ انت بلے وھدے زوراک ءَ ماریت کہ بلوچ پہ بیھار نہ ترسیت گڈا بجن بکوش چگل دئے پالیسی بلوچانی تہ ءَ ترس پیداک کتگ –
ماما قدیر بلوچ ءَ گوشتگ کہ ھزارانی کچ ءَ بلوچ نودربر سیاسی باسک ءُ ھمدرد آوار جنگ ءُ آھانی زانگولیں جون چگل دیگ بوتگ انت اے انسانیت کوش وئیلاں درچ ءِ برجاھی ءَ پد بلوچاں وتی گام نہ داشتگ انت گڈا زوراک گوں دمگی ڈنگانی گوم ءَ ھوار بوتگ ءُ کشندہ ٹی جوڈ کتگ بلوچانی کشگ ءُ دگہ سلکاریاں ھوار بوتگ گوستگیں ماھے میان ءَ پاکستان ءِ زوراکی لھتے درور مئے دیم انت –