صالحہ مری زورانسری آوار جنگ بوتگیں لوگواجہ ءِ واتری ءِ ودار انت

زورانسری آوار جنگ بوتگیں میر تاج محمد سرپرہ ءِ لوگبانک ءَ گوشتگ کہ آئی ءِ لوگواجہ ءَ دو سال سرجم بوھگ انت کہ پاکستان ءِ چیریں ادارھانی بندیگ جاھان اِنت –

صالحہ مری ءَ گوشتگ کہ آئی ءِ لوگواجہ ءَ شکری ءِ نادراھی بوتگ ءُ آئی الاج ھم لندن ءَ بوھگ ءَ بوتگ کہ پاکستان ءِ چیریں ادارہ پوج ءِ گوم ءَ ھوار بوتگ ءُ منی لوگ واجہ ءِ آوار جتگ کہ ھماھیں پاکستان ءِ چیریں ادارھانی بندیگ انت –

صالحہ مری ءَ گوشتگ کہ منی لوگواجہ ءَ بیست ماہ انت کہ گیرکانودی آوار جتگ ءُ بیگواہ کتگ اے وڈ کہ ھچ ملک ءَ کنگ نہ بیت ءُ اے امل کانود ءُ رھبندانی بگیری یے –

زانگ بہ بیت تاج محمد سرپرہ نوزدہ جولائی دوھزار بیست ءَ ناشناسیں مردماں سند ءِ بنجاھی شھر کراچی ءَ چہ آوار جتگ آئی ءَ چہ پد ھچ وڈیں ھال اھوال ءِ نیست یے –

صالحہ مری ءَ گوشتگ کہ لوگواجہ ءِ زورانسری آوار جنی ءَ چہ مئے زند ازاب ءِ تہ ءَ گوزگ انت ءُ اے وئیلے سی سی ٹی وی تامر ھم ھست انت بلے دگہ تامرانی شوھاز کنگ ءَ ادارہ نئیلگ ءَ انت ءُ ما ارزی ھم نبشتہ کنائینتگ بلے پولیس ءَ تچکی ءَ گوشتگ کہ چیریں ادارھانی بگیری ءَ ما ھچ وڈیں گامگیج نہ زوریں –

بیگواھیں تاج محمد سرپرہ ءِ لوگبانک ءَ چہ انسانی ھکانی ادارھاں چہ لوٹ کتگ گوشتگ کہ آئی ءِ لوگواجہ ءِ پہ وش ءُ سلامتی یل کنائینگ ءَ آئی ءِ کمک ءَ بہ کن انت –