بلوچستان لبریشن فرنٹ ءِ جارکش میجر گھرام بلوچ ءَ گُوشتگ کہ شھید سکندر بلوچ ءَ ستاشانی پیش کنیں۔ آئی ءَ گُشتگ اپریل ءِ اولی روچ ءَ سرمچاریں کیپٹن سکندر بلوچ پنام شئے مرید جھمنند گومازی پاکستانی پوج ءَ گوں دیم پہ دیمی جنگ ءَ نمیران بیتگ۔ آ دگہ یک سرمچاریں سنگتے ءِ ھمرائی ءَ مند ءِ کوھی دمگ تلیدار ءَ چہ در اتکگ ءُ مدامی ردءَ گَشت کنگ ءَ بیتگ اَنت کہ آیاں زورگیریں پوج ءَ گوں دیم پہ دیمی بیتگ اَنت، چریشی ءَ یک میڑ ءِ بندات بیتگ۔ دوھیں سرمچاراں دلیری ءَ گوں قوضہ گیریں پوج ءِ دیمپانی کُتگ۔ اے نیام ءَ پوج ءَ آزمانی کمک رستگ ایس ایس جی کمانڈوز ایر گیجگ بیتگ اَنت۔ جنگ ءِ تہءَ سَے ایس ایس جی کمانڈوز مُرتگ ءُ بازیں ٹپی بیتگ اَنت۔ شھید سرمچار کیپٹن سکندر بلوچ ءِ ھمراھیں سرمچار کمو ٹپی بیگ ءَ پد چہ آودہ سوبمندی ءَ گوں در کپتگ ءُ رکیتگیں جاھے ءَ سربیتگ۔
جارکش ءَ گُوشتگ کہ شھید سکندر بلوچ چہ نودربری زمانگاں بلوچ سیاست ءِ بھر بیتگ ءُ 2013 ءَ بی ایل ایف ءِ پلیٹ فارم ءَ چہ بلوچ راجی آجوئی ءِ جھد ءَ گوں بندوک بیتگ۔ آ یک وانندگیں زانتکاریں ورناھے بیتگ۔ اے وھداں کیمپ ءِ کماندار ءِ نہ بیگ ءِ سوب ءَ آئی ءِ کیمپ ءِ کمان گون بیتگ۔ آئی ءَ گل ءِ سنگتانی سیاسی تربیت ءُ گل ءِ دیمروی ءِ تہءَ جوانیں کردءِ پیلو کُتگ۔ آئی لائقی، جانفشانی ءُ مھنت گل ءِ سنگتانی ھاترءَ یک مزنیں درور اِنت۔
جارکش ءَ گُوشتگ شھید سکندر ءِ کھول ءَ بلوچ راجی آجوئی جُنز ءِ تہءَ بے دروریں دیمھونی داتگ اَنت۔ آئی پِت چئیرمین دوست مھمد ملٹری انٹیلیجنس (ایم آئی) ءَ بیست یک مئی دوھزار ھپدہ ءَ تلار ءَ مساپر بس ءَ ایر گپتگ ءُ بیگواہ کُتگ اَت ءُ بیست پنچ مئی دوھرازھبدہ ءَ دشت کُنچتی کراس ءَ آئی جون دزکپتگ اَت۔ ھمے سال ءَ پانزدہ فروری ءَ شھید سکندر ءِ مستریں برات طاھر بلوچ گومازی ءِ ھسپتال ءَ ڈیتھ اسکواڈ ءَ تیر گواری کُتگ ءُ شھید کُتگ اَت۔
جارکش ءَ گُوشتگ ما شھیداں ستاشانی پیش کنیں ءُ آھانی مشن آزاد بلوچستان ءَ داں منزل ءَ سر کنگ ءِ اھد کنیں۔