زندگی ازابے بوتگ – جلال اھمد

نبشتانک: زندگی ازابے بوتگ

نبشتہ کار : جلال اھمد

دی بلوچستان پوسٹ

درکسانی ءَ کہ ما سر چِست کُت دان ھوش ءُ اکل بُوتیں گُڑا گْوش ئے آ دور سک وش اَت ، سُھب ءَ مھلا پاد ءَ کُوپ ءِ چاہ گوں روگنی نان ءَ بُہ وَر ءُ دویں کتاباں زُور دیم پہ وانگجاہ ءَ رھادگ بُو، پد ءَ چار کلاک ءَ پد گِس ءَ واتر کن انچوش کہ گِس ءَ سر بُوتگ ئے گُڑا دویں کتاب اِیر کتگ اَنت ءُ دپارے وارتگ ، وتی چاگل چہ مَشک ءَ آپ ءَ پُر کتگ اَت ءُ دیم پہ رمگ ءَ چارینگ ءَ شُتگ اِنت۔

برے وھدے ماں پاد شپاد ءَ اے گِس ءُ آ گِس گرمانی جَل ءَ بلے ھچ پرواہ نیست اَت ، ناکہ شُد ءَ پرواہ ءُ نا کہ تُنے ھست اَت۔ مئے ھلک ءَ گیشتر کھت ءُ ڈکّال اَت دِیر دِیراں پد ھَور بُوتگ اَت گُڑا جمبر کہ بُوتگ اَت ما سک گَل بُوتگ اَت اِنت کہ نوں اَلّم ھَورے بیت۔ مئے گِسانی دیم ءَ یک مَچکدگے ھست اَت گُڑا ھامین کہ بُوتگ اَت ما دیم پہ ھمے ڈگار ءَ ناہ ءِ چِنگ ءَ شُتگ ءُ بیگاہ ءَ کہ گوْات ءَ ترْند کش اِتگ اَت ما دْراھیں چُک امب ءِ چِنگ ءَ شُتگ اَنت بس ھمے وڑیں ساھت من ءَ باز گِیر کاینت۔

بلے دُگنیا دیم ءَ شت ءُ وھد ءُ ساھت مَٹ بُوان بُوت اَنت ریڈیو ءُ ٹیپانی دؤر شُت موبائل اَتک سنگتی ،براتی ءُ گپ ءُ دیوان ،مردم گِری دْراہ شُت اَنت۔ ھما زندگی ءِ جْوانیں ساھت اَت اَنت آ نوں بدل بُوت اَنت مروچی ئیں وھد ءَ ھر کس گوں وت ءَ سر ءُ چیر اِنت من اے گپ ءَ نہ آں کہ موبائل ءَ سرجمیں دُگنیا ءَ را نُکس دات بلکیں ناں، آ راج کہ آسُودگ اَنت ءُ آجوئیں راج اَنت آ وتیگ ءَ برابر اَنت ،بلے گُلامیں راجاناں ءُ گِیشتر بلوچ ءَ را اِیشی ءِ زِبھر کتگ ھما وھدی دیوان ءُ وھدی مردم گِری بلوچے بیتگ مروچی آ نہ مانئیت اگاں ھست اِنت گُڑا آرت ءِ نیام ءَ واد ءَ بِستاریں۔ اے وھد ءَ اگاں دیوانے بیت گُڑا ھر کس وتی ڈولیں کس ءَ را ھچ سُد ءُ سما نیست اِنت۔ پرز کن یک کُوٹی ءِ تھ ءَ دہ مردم نِشتگ گُڑا ھر یکّے ءَ را جتا یک موبائلے گون ءُ سر ءُ پُٹ اِنت گپ ءُ ترانی نہ اِنت-

ما اگاں پِگر بہ کنیں مروچیگیں دؤر ءَ مردمانی پریشانی ھمے دْراھیں کارپداں کتگ اَنت ءُ مردم دوستی ءُ براتی گِری دْراہ ھمیشاں ھلاس کتگ اَنت۔

باید ما بلوچ راج وتی بُن پیرکی دُوداں ھچ بر پراموش مہ بہ بہ ایں ءُ وتی مھمان نوازی ءُ دیواناں دائم برجم بِہ داریں، شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔