لاھور: دو بلوچ نودربر زورانسری آوار جنی ءِ آماچ کنگ بیتگ اَنت

پاکستان ءِ اُستان پنجاپ ءِ بنجاھی شھر لاھور ءَ وانوکیں بلوچستان ءَ سیادی داروکیں دو نودربر زورانسری آوار جنی ءِ آماچ کنگ بیتگ اَنت-

وئیل ءِ بارو ءَ گپ کنان ءَ لاھور ءَ سیادی داروکیں ڈان نیوز ءِ اھوالکار عمران گبول ءَ گُشتگ بلوچستان ءَ سیادی داروکیں نودربر سَے شمبے ءِ شپ ءِ ساھت دَہ لس پوشاکی مردماں لاھور ےَ مسلم ٹاؤن ءَ چاہ بھا کنوکیں اسٹال ءَ چہ آوار جتگ اَنت-

ڈان نیوز ءِ اھوالکار ءِ رد ءَ بلوچ نودربر لاھور ءَ پنجاپ کالج ءَ وانگ ءَ بیتگ اَنت کہ آیانی پجار آدم ء مھمد علی ءُ عمراب ء شبیر اھمد ءِ ناماں زانگ بیتگ اَنت-

وئیل ءِ راست کنان ءَ دگہ یک بلوچ نودربرے ءَ گُشتگ عمران ءُ آدم ءِ سیادی بلوچستان ءِ دمگ کیچ تربت تجابان ءَ اِنت ھردوک فرسٹ ائیر ءِ نودربر اَنت چریشی ءَ پیسر سیکورٹی ادارھاِ لاھور ءَ دزگیر کتگ ءُ گوں وت برتگ اَنت-

آئی ءَ گُشتگ کہ ھردوکیں نودربر چریشی ءَ پیسر ھمے سال ءِ جنوری ءِ ماہ ءَ لاھور ءَ دگہ دو بلوچ نودربرانی ھمراھی ءَ آوار جنگ ءُ بیگواہ کنگ بیتگ اَنت بلے پد ءَ یل کنگ بیتگ اَنت-

لاھور ءَ چریشی ءَ پیسر بلوچستان ءِ جھمند زورانسری آوار جنی ءِ آماچ بیتگ اَنت اشانی تہ ءَ ھمے ماہ ءِ پنچ مارچ ءَ لاھور ءَ تبلیغی جماعت ءَ روکیں نوشکی ءِ جھمنندیں ھارون ء شاھنواز خان بادینی ءُ سلال ء ھاجی عبدالباقی بادینی ھوار اَنت کہ اے مسیت ءِ تہ ءَ گرگ ءُ برگ بیتگ اَنت-

ھمے وڑ ءَ فروری دوھزار ءُ بیست ءُ دو ءَ سَے بلوچ مزدور جمال خان بادینی، مھمد نواز بلخانی ءُ فاروق خان زورانسری آوار جنی ءِ آماچ کنگ بیتگ اَنت-

پنجاپ ءَ بازیں کچے ءَ بلوچ نودربر وانگ اَنت نودربرانی گوشگ اِنت آیاں پنجاپ سیکورٹی ادارہ ءُ یونیورسٹی انتزامیہ ءَ ھوار چیریں ادارانی کارندھانی نیمگ ءَ بیھار رسگ ءَ اَنت اے رویشانی ھلاپ ءَ بلوچ نودربراں بیست ءُ یک مارچ ءَ کلاسزانی بائیکاٹ کتگ ءُ سرجمیں ڈیھ ءَ زھرشانی کتگ –

نودربرانی گوشگ اِنت سول ڈریسیں مردم سلاہ بند اَنت بلوچ نودربراں ترسینگ ءَ اَنت بازیں نودربر پولیس ءَ گپتگ ءُ دومی روچ ءَ یل کتگ اَنت-