بلوچ نودربراں کلاس نہ گپتگ ءُ مزنیں کچے ءَ زھرشانی کتگ

بلوچستان ءَ زورانسری آوار جنی ءُ بلوچ نودربراں تُرسینگے بگیری ءَ نودربر گلانی نیمگ ءَ مزنین کچے ءَ زھرشانی کنگ بوتگ –

نودربرانی نیمگ ءَ زھرشانی جار ءِ پد بلوچستان ءِ زانشجاھاں ھوار پنجاپ ءِ مزنیں شھر ءُ سند ءِ بنجاھی شھر کراچی ءَ نودربراں کلاس نہ گپتگ ءُ روانک کش اِتگ ءُ زھرشانی کُتگ وھدیکہ دگہ زانشجاھاں نودربرانی نیمگ ءَ پیس واک کنگ بوتگ –

بلوچستان ءِ جتا جتائیں دمگاں ھم نودربراں کلاس نہ گپتگ ءُ زھرشانی کُتگ –

زانگ بہ بیت اے زھرشانیانی جار بلوچ طلباء کونسل اسلام آباد ءِ نیمگ ءَ چہ بیگواھیں حفیظ بلوچ ءُ دگہ بلوچ نودربرانی زورانسری آوار جنی ءَ ھوار پنجاپ ءِ زانشجاھاں بلوچ نودربرانی ترسینگے بگیری ءَ جنگ بوتگ – زھرشانی ءَ لاھور، اسلام آباد شال، کراچی، بہاولپور، ملتان، تربت، فیصل آباد ءَ ھوار دگہ دمگان کنگ بوتگ انت –

پنجاپ ءِ شھر بہاولپور ءَ بلوچ ایجوکیشنل کونسل ءَ کشگ بوتگیں روانک اسلامیہ شھدربرجاہ بھاولپور ءِ واکداراں داشتگ ءُ نودربر زھرشانی کنگ ءَ مکن کُتگ انت، جتا جتائیں دمگاں اھوالکار ءُ انسانی ھکانی گلاں نودربرانی زھرشانی ءِ پلامرزی کُتگ ءُ زھرشانیاں بھر زرتگ -.

دومی نیمگ ءَ بلوچ نودربرانی نیمگ ءَ اسلام آباد پریس کلب ءِ دیم ءَ زھرشانی بنجل ھم برجاہ بوتگ وھدیکہ اسلام آباد پریس کلب ءَ ھوار دگہ شھرانی پریس کلب ءِ دیم ءَ نودراں وتی زھرشانی نبشتہ کنائینتگ –

جتا جتائیں شھراں زھرشانی ءُ ھوار ھوار نودربرانی نیمگ ءَ سوشل میڈیا زھرشانی ٹرینڈ ءِ ھم چلائینگ بوھگ ءَ انت –

وھدیکہ اسلام آباد پریس کلب ءِ دیم ءَ زورانسری آوار جنگ بوتگیں حفیظ بلوچ یل کنائینگے زھرشانی میان ءَ پولیس نیمگ ءَ ارزی ھم آمیدگس ءَ ھلاس کتگ –

اسلام آباد ہائی کورٹ ءَ چیف جسٹس اطہر امن اللہ ءَ ایمان مزاری ءُ بلوچ نودربرانی بگیری ءَ نبشتہ ایں ارزی سماعت کتگ –

ایمان مزاری ایڈوکیٹ ءَ ارزی ءِ ھلاس کنگ ءَ آمیدگس ءَ شُتگ بوتگ –