ریکوڈک معاہدہ ءِ سر ءَ دزنشان جنگ بوتگ انت

بلوچستان ءِ مزن وزیر قدوس بزنجو ءَ مروچی یکشمبے ءَ شال پریس کلب ءَ اھوالکاراں گوں تران کنان ءَ گوشتگ کہ بلوچستان ءَ نوں انسرجنسی ناں بلکیں سرمایہ کاری کنگ بیت اِنت –

آئی ءَ گوشتگ کہ ریکوڈک معاہدہ ءَ چہ نوں بلوچستان ءِ دیمروئی کنگے نوکیں دورے بندات بیت اِنت –

اھوالکار ءِ رِد ءَ ریکوڈک پراجیکٹ بھالی ءِ ھاتر ءَ مروچی کینڈین کمپنی، وفاقی سرکار ءُ بلوچستان سرکار ءَ معاہدہ ءِ سر ءَ دزنشان جتگ انت – نوکیں معاہدہ ءِ تہ ءَ کینیڈین کمپنی پنجاہ درسد ءُ وفاقی ءُ بلوچستان سرکار ءَ بیست ءُ پنچ بیست ءُ پنچ درسد رسیت – ریکوڈک پراجیکٹ ءِ بھالی ءَ بلوچستان ءَ دھ ارب ڈالر ءِ سرمایہ کاری کنگ بیت اِنت، یک ارب ڈالر ءِ انفراسٹرکچر، اسکول، کانکنی ءِ تربیتی انسٹیوٹ ھوار دگہ چاگردی کارانی سر ءَ ھرچ کنگ بیت اِنت – معاہدہ ءِ بھالی ءَ پد کمپنی پاکستان ءِ سرا پیسری شش ارب ڈالرانی وام ءَ ھلاس کنت –

دومی نیمگ ءَ پاکستان ءِ سر وزیر عمران خان ءَ چاگردی ترامجاہ ءَ ٹویٹر ءَ نبشتگ کہ دھ سالانی مزاکرات ءُ کانودی جنگ ءَ پد اے معاہدہ کنگ بوتگ ءُ معاہدہ ءِ رِد ءَ بلوچستان بلین ڈالر ءِ سرمایہ کاری کنگ بیت-

آئی ءَ گوشتگ کہ بیرک گولڈ ءِ معاہدہ ءَ ھشت ھزار نوکیں کاردار دارگ بیت اِنت –