نبشتانک: دل ءِ واھشت سرجم نہ بُوت اَنت
نبشتہ کار : جلال اھمد
دی بلوچستان پوسٹ
انچوش کہ ما دْراھیں سنگت وانگجاہ ءَ سُھب ءَ مھلا اَتکگ اِت انت گڑا مُدام سنگتاں گْوشتگ اَت کہ دہ ءَ سرجم کنگ ءَ پد سرجمیں سنگت پہ گِیشتریں وانگ ءِ واست ءَ دیم پہ شال ءَ روئیں۔ لھتیں سنگت ءَ را دل ءَ نہ اَت ءُ لھتیں زر ءَ ھوالہ ءَ سست اَت ءُ لھتیں سنگت تیار اَت پہ شال ءَ وانگ ءَ رؤگ ءَ-
گڑا سنگتاں مُدام من ءَ ھم جُست کتگ اَت کہ تو کجا روئے وانگ ءَ ؟ من ھم سنگتاناں ھمے پسّو داتگ اَت کہ من ھم جُھد کن آں کہ شال ءَ بُہ رَو آں منی دْراھیں سنگت سرپد اِت انت کہ من ءَ گِیشتر گوں وتی زُبان ءَ مھر اِنت ، چیاکہ ھر وھد من بلوچی شئیر ، نبشتانک ، لبزانک ءُ بلوچی کتاب ونتگ اَنت من ءَ دَری زُبانان گوں ھچ وڑیں دوستی نیست اَت۔
ھمے ڈول ءَ کدی کدی وانگجاہ ءَ کہ بچک مُچ بُوتگ اَت انت گڑا یکے دومی ءَ را جُست کتگ اَت کہ تو چے وان ئے؟ لھتیں سنگت ءَ گْوشتگ اَت ما (میڈیکل) ءُ لھتین ءَ گْوشتگ اَت کہ ما (انجنئیرنگ) وانیں۔ چیزی ءَ (بزنس) ءُ چیزی ءَ (اکنامکس) ءَ نام داتگ اَت۔ گڑا اے پئیمیں ساھتاں من مُدام جیڑ اتگ اَت کہ پہ وتی زُبان ءَ کَس نہ جیڑ اِیت ، اے وڑیں ساھتاں من ءَ سک بژن بیتگ اَت بلے منی ھُب ءُ واھگ ھمیش اَت کہ من پہ وتی زُبان چیزے بِہ کن آں۔ من ءَ را وتی زُبان سک دوست اَت ءُ انگت چو ساہ ءَ پئیم ءَ دوست اِنت۔
وھد مٹ بُوان بُوت دانکہ دہ ءِ وانگ سرجم بیت ءُ نوں چیزے سنگت ءَ را چہ گِس ءَ مُوکل رس اتگ اَت کہ چکّاساں رند دیم پہ شال ءَ بُہ رَو اَنت ءُ منی ھم دل ءَ اَت کہ من ھم گوں سنگتان ھوار بُہ رو آں گوں، بلے بدبھتی منی ھمیش اَت کہ من ءَ دیم ءَ وانین نُوک نیست اَت۔ من اے گپ ءَ ھچ بر نہ گْوش آں کہ من انچیں گِسے ءَ چہ بندوک آں کہ آیانی گْورا زر نیست بلکیں دُرس ءَ برابر اَت انت بلے بس اِیشاں وانگ ءُ سرکار ءَ نوکر بُوگ لوٹ اِتگ اَت کہ من ءَ پہ نوکری ءَ ھاترا وانگی نہ اَت-
من ءَ بے کساس بژن بُوت کہ منی مردم وانگ ءِ راستیں مکسد ءَ سرپد نہ اِت انت ءُ من کہ آ واھشت وتی دل ءَ داشتگ اَت اَنت آ نہ سرجم بُوت اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔