سلام منی مھروانیں اُستاد- مولا بخش بلوچ

نبشتانک: سلام منی مھروانیں اُستاد

نبشتہ کار: مولا بخش بلوچ

دی بلوچستان پوسٹ

رب ءِ دَر ءَ اے دو ءَ اِنت کہ پُر گنجیں بھشت ءَ بات ئے آمین لھتے وھد بیت کہ دل ءَ بوتگ پتو چیزے نبشتہ بکناں بلگ منی اے نزوریں لنککاں پہ قلم ءِ زورگ ءِ ہمت نہ کتگ مرچی نزاناں چونکائی اے بے ھاٹیگیں لنکک ءُ قلماں پہ تئی شھیدیں ارواه ءَ یک ناتوانیں ءُ گڑبڑیں چیزے نبشتہ کنگ ءِ ھاٹیگ داشتگ اگاں تئی ارواه ءَ دوست نہ بوت گڑا من ءَ پھل کن کربان آں-

انوں من تھنا نشتگاں ءُ جیڑگایاں کہ تئی دستانی تہ ئے رستگیں ورنا باریں داں کد تئی پادانی ہمراه باں داں کد چمانی تراولاں نوشان ءُ تئی پدرنداں کاینت ! تئی گپ ءُ کندگانی برورد انت مرچی من ءَ چشیں ھمتے بکش اِتگ اے تھاروکیں دیدگاناں یک استار دروشمیں شھمے بکش اتگ ھر وھد ءَ کہ گوں تو هال بوتگ گڑا اے نابود ءِ دل ءَ پہ مردی گشتگ کہ من اوں باندا اسدے باں جنگ کناں پہ زمین ءَ ندر باں-

منی دیدگیں استاد گندے عید ءِ وھد اَت ترا من هال کتگ اَت تو گشتگ اَت کہ من کایاں تئی علاقہ ءَ من اود ءَ نہ اِت اَنت زاناں منی ، تئی دیدار نہ بؤگی اَت بلئے تو باز اشتاپ کت ترا برداش کنگی اَت اوپار کنگی اَت اے نابود گوں وت ءَ کنگی اَت-

منی دیدگیں استاد ہما روچ ءَ کہ تئی شھیدی ءِ هال شنگ اَت گڑا اے دل ءِ دریکگ گیش بوت اَنت سک بلاهیں جیڑگے ءَ کپتاں ءُ همے گشت کہ تو پرچا اینچو اشتاپ کت بلئے مرچی اے ساھت ءَ اوں من ، تو پورا کش ماں کش نشتگیں ءُ من ءَ گشگ ءَ ئے کہ پُلو وت ءَ مھکم کن وتی زور ءَ گوں وتی کار ءَ بکن بس پہ زمین ءَ بہ جیڑ-

منی پُر گنجیں استاد بیا زوت بیا ترا کلانچ ءِ کشک ، کوه توار ءَ اَنت تئی وداریگ اَنت کجام دمان ءَ کہ تو کائے ترا گنداں اے گم ءِ جہلیں دریا ءَ چہ گوزاں بلئے ہر وہد منی دو ءَ اِنت تو ابدمانیں جاہ ءَ شھیدانی درگاہ ءَ بات ئے تئی نابودیں ورنا اوں پتو پیداک اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔