شال: بیگواھیں مردمانی ھاتر ءَ زھرشانی برجاہ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ شش سد ءُ ھپت روچ سرجم بوتگ انت – زھرشانی بنجل ءَ زورانسری آوار جنگ بوتگیں فیاض بلوچ ءِ لوگبانک نرگس بلوچ، بیگواھیں آصف ءُ رشید ءِ گھار سائرہ بلوچ، ماما قدیر بلوچ ءُ دگہ بلوچ باسک ساڑی بوتگ انت – ھمے وھد ءَ زند ءِ جتاھیں تک ءُ پھناتاں سیادی داروکیں مردماں بنجل ءَ اتکگ ءُ بیگواھیں مردمانی کھولانی گوم ءَ دلپدردی درشانتگ –

بنجل ءَ اتکگیں مردمانی گوم ءَ تران کنان ءَ ماما قدیر بلوچ ءِ گوشگ ات کہ اے جھان ءَ بازیں مردمے جوانیں کرد پیلو کنت کہ آھانی کار ھچبر شموشگ نہ بنت – اے وڑیں مردمانی داں ستاہ ءَ مہ کنے مردم ءَ وش نہ بیت ھمے وڑ بلوچ راج ءَ ھم ھنچیں مات ءُ گھار ودی کتگ کہ زلم زوراکیانی بگیری ءَ تمردی ءَ گوں اوشتاتگ انت ءُ ھمک وھد ءَ آئی دیمپانی ءَ کنگ ءَ انت –

ماما قدیر بلوچ ءِ گوشگ اَت کہ مروچی پرایمنیں جھد ءِ تہ ءَ بلوچ پرزندانی یل کنائینگے ھاتر ءَ بلوچ ماتاں ھنچیں جِنک ودی کُتگ کہ ھر بلوچ ءِ درد ءَ پھم اِت کن انت – ھر وڑیں پند ءُ گرمی ءُ سارتی آھاں بازیں سکی ءُ سوریانی دیمپانی کنگ کپتگ بلے ھنگت وتی جھد ءِ برجاہ داشتگ-