آزمانک: دہ سالیگیں ہوشام
نبشتہ کار :عبدالواجد بلوچ
دی بلوچستان پوسٹ
تو من ءَ سک دوست بہ ئے من ھمائیں کہ ترا دوشی دیستگ من بے کراراں انچو سما بیت من ءَ گوں تو مھر انت اے گپّانی اشکنگ ءَ من یک برے پھک ءَ ھبکّہ بوتاں ءُ پد ءَ دل ءَ ارمانے چست بوت کہ کرنے بیت باتن ءِ زندگیں درچک پہ بے مھری ءَ لیمُرتگ بگندے نی اے مھرے ھئورے گورتگیں یک ترمپے ءَ منی باتن ءِ لیمُرتگیں درچک پد ءَ شاہ بجنت ءُ سبز ءُ آباد بہ بیت-
ھمے ھیالاں گوں گلائیش اتاں من نہ پُشت چار ات ءُ نہ دیم بس ھو کُت، من انچو سرپد بوتاں آ منی بالادے کوراسی ءَ ہلاس کنت چو گنوکانی پئیم ءَ سرگردانیں مَن بلکیں بگندے انسانے بہ باں، منی سرگردانی ءِ سوب ریٹائی نہ ات بلکیں من پہ مِھر تلوسگ ءَ اتاں، منی اولی زندے پُرشت ءُ پروشی ءَ رند من مھرے شوھاز ءَ اتاں پرچا کہ اولی زندے نا مھری انسانی لالچانی آماچ ات، چاریں نیمگاں ایوکی ءِ سوتکگیں دیار من ءَ چو زیم ءَ تج جنگ ءَ ات من ھمے سرپد بوتاں اے آ منی زردے ڈُکّالی ءَ گوں وتی مھراں سبز ءُ آباد کنت من ءَ ھچ اوں سما نہ بیت کہ آ وتی دہ سالیگیں ہوشام ءِ ترْھینگ ءَ ہلاہوش انت، آئی ءِ واستا اے بلاھیں گپے نہ ات کہ چی پئیم گوں منی مارشتاں لئیب ءَ انت، آئی ءِ پگر ہمیش ات بس منی ہوشام بپُرش ایت ءُ من آباد بہ باں گوں وتی گوستگیں زندے دوئیں ہمراہ آں ۔۔۔آئی ءَ کمّو ہوں ھیال نہ کت کہ وتی زندے وشیانی گرگ ءِ واستا آ یک گیمرتگیں درچکے ءِ ہونڈالاں زھر مانریچان اَت من ءَ وھدے سما بیت کہ من سکّیں ردیں کارے کتگ منی سادگی منی دژمن ات، اے چاگرد ءِ تہ ءَ بنی آدم اینچو لالچی بیت من ءَ اولی رندا سما بوت، منی کور آسیں زند ءِ تہ یک رندے پد ءَ ہلاس نبوھوکیں ڈکّالی ءَ سر کشّ ات باتن ءِ ھمک ریشگ ءَ آس کپت ،ابیتکی ءِ جمبرانی مانشانگ ءَ پد تہنائی ءُ ملوری یے ھور ءَ گوارگ بندات کت بلے من پد ءَ آ انسان نبوتاں کہ پیش ءَ ات اَنت ،پرچا کہ من ھمے سرپد بوتاں کہ تئی آیگ ءَ پد من نوکیں زندے ءِ بہاراں گنداں، امیت ءُ ارمان ءُ نیکیں واھشانی دیارے پہ وت ءَ آباد کناں ءُ تو منی ھمسپر بہ ئے-
بلے تو ھم چو دنیا ءِ آ دگہ بنی آدمانی پئیم ءَ وتی نپ چار ات، وتی وشیانی پگر ات ترا، تو ءُ تئی دوئیں ھمراہ ءُ تئی دہ سالیگیں ہوشام من پہ ترا یک وسیلہ اتاں بلے ترا اے سما نیست ات کہ پہ وتی نپ ءِ ھاترا دگرانی زندے جھنم جوڑ کنگ ءَ کس پادار نہ بیت، ھئو من یک رندے پد ءَ ابیتکی ءُ تہنائی ءِ دریا ءَ اوژناگ کنان آں بلے تو ایمن مہ بو تئی اے دہ سالیگیں ہوشام داں کیامت ءَ آسر نہ بیت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔