بلوچستان ءَ انوگیں پوجی کاروائیانی بگیری ءَ کراچی ءَ زھرشانی

بلوچستان ءَ پوج ءِ نیمگ ءَ ھمے زوتاں بوتگیں لشکر کشیانی بگیری ءَ بلوچ یکجھتی کمیٹی ءَ وائس فار بلوچ مسنگ پرسنز ءُ زورانسری آوار جنگ بوتگیں مردمانی کھولانی ھمراھی ءَ سندھ ءِ مزن شھر کراچی ءَ زھرشانی کُتگ –

بلوچ یکجھتی کمیٹی ءِ نیمگ ءَ چہ لیاری ھشت چوک ءَ بگر تاں کراچی پریس کلب ءَ روانکے کشگ بوتگ وھدیکہ زھرشانی کنوک پشتون تحفظ مومنٹ ءِ ننداک ءِ سر ءَ ھم شُتگ انت –

کراچی روانک ءَ کراچی پریس کلب ءِ دیم ءَ اتکگ ءُ مچی دروشم ءَ دراہ یکجاہ بوتگ انت، زھرشانی ءَ چہ بلوچستان ءَ زورانسری آوار جنگ بوتگیں مردمانی کھول، پشتون تحفظ مومنٹ ءِ باسک ءُ رھشوناں ھوار نودربراں مزنیں کچے ءَ بھر زرتگ وھدیکہ وائس فار بلوچ مسنگ پرسنز ءِ کمک سرکماش ماما قدیر بلوچ ھم روانکے بھرے بوتگ –

کراچی زھرشانی ءِ جار بلوچ یکجھتی کمیٹی ءِ نیمگ ءَ بلوچستان ءَ ھمے زوتاں کریک ڈاؤن، بازیں دمگاں پوجی لشکر کشیاں ھوار بلوچستان ءِ جتا جتائیں دمگاں مردمانی زورانسری آوار جنی ءِ بگیری ءَ جنگ بوتگ –

زھرشانی کنوکانی گوشگ ات کہ چیزے روچ بیت اِنت کہ بلوچستان ءَ ریاستی ادارھانی نیمگ ءَ زورانسری آوار جنی ءَ ھوار دگہ انسانی ھکانی لگتمالی ءِ تہ ءَ گیشی اتکگ – بلوچستان ءِ جتا جتائیں ھند ءُ دمگاں نودربر، استاداں بازیں کچے ءَ مردم زورانسری آوار جنگ ءُ بیگواہ کنگ بوتگ انت وھدیکہ بازینے لٹ ءُ کُٹ کنگ ءَ پد کُشگ بوتگ انت ءُ آھانی زانگولیں جون چگل دیگ بوتگ انت –

آھانی گوشگ ات کہ بلوچستان ءَ ریاستی کریک ڈاؤن بازیں دھک ءَ برجاہ انت بلوچستان ءَ مدامی ریاستی زوراکیانی تہ ءَ گیشی آرگ بوتگ ءُ کانود ءُ آمیدگس اے زوراکیانی سر ءَ ھچ گوشگ ءَ نہ انت وھدیکہ پوج ءَ مھار بڈا دیگ بوتگ ءُ یل کنگ بوتگ کہ ھرچی آئی دل بلوٹیت چست بکنت بجنت بکوشیت ءُ جوناں چگل بہ دنت – رسانکدرانی بلیک آؤٹ ءِ سوب ءَ بلوچستان ءَ چہ ھچ وڑیں ھال ڈن ءَ در نئیت ءُ میان استمانی انسانی ھکانی ادارھاں وت ءَ ھنچوش کُتگ کہ ھچ ءَ سرپد نہ انت –

زھرشانی ءَ بیگواھیں آصف ءُ رشید ءِ گوھار سائرہ بلوچ، بیگواھیں عظیم دوست ءِ گوھار، متحدہ عرب امارات ءَ زورانسری آوار جنگ بوتگیں انسانی ھکانی باسک راشد حسین بلوچ ءُ عبدالحفیظ زھری ءِ کھول ، دہ ماہ ساری کراچی ءَ آوار جنگ بوتگیں عبدالحمید زھری ءِ زھگ سعیدہ حمید، بیگواھیں عالم لہڑی ءُ حب چوکی ءَ بیگواھیں عامر بلوچ ءِ کھول ھم ھوار بوتگ انت –

بیگواھیں مردمانی کھولاں اھوالکاراں گوں تران کنان ءَ وتی دوستیگیں مردمانی یل کنائینگ ءُ آھاں زاھر کنگے ھاتر ءَ سرکاری ادارہ ءُ انسانی ھکانی گلاں چہ لوٹ کُتگ کہ وتی کرد ءَ پیلو بہ کن انت – وھدیکہ نودربراں ھزدار ءَ چہ زورانسری آوار جنگ بوتگیں حفیظ بلوچ ءِ اکس ھم گون بوتگ –

کراچی ءَ زھرشانی کنوکانی گوشگ ات کہ بلوچستان ءِ جتا جتائیں دمگان پاکستانی پوج ءِ زوراکی، گِسانی سر ءَ بیڑ برگ ءُ مردمانی زورانسری آوار جنی ءِ درچ یکشل ءَ برجاہ انت زھرشانی کنوکاں سرکاری ادارھاں چہ لوٹ کتگ کہ بلوچستان برجاھیں زوراکی دارگ بہ بیت ءُ بیگواھیں مردم وش سلامتی یل کنگ بہ بنت –