زورانسری بیگواھیانی آماچیں بلوچ سیاسی جھدکارانی یل کنائینگ ءِ ھاترءَ وائس فار بلوچ مسنگ پرسنز ءِ زھرشانی ءَ 4569 روچ سرجم بیتگ اَنت۔
کراچی پریس کلب ءِ دیما برجاھیں زھرشانی بنجل ءَ مروچی سندھ سجاگی فورم ءِ بنجاھی رھشون سارنگ جویو، سیدمسھود شاہ، جان محمد خاصخیلی، یٰسین ءُ دگہ رھشوناں یکجاھی درشان اِتگ۔
اے وھدءَ وی بی ایم پی ءِ وائس چیئرمین ماما قدیر بلوچ ءَ گُشتگ کہ مروچی ھزارانی کچ ءَ بلوچ ءُ سندھی وتی راجی اگبالانی جھد ءِ پُشدرءَ استانی ادارگانی بندیگ جاھاں لٹ ءُ کُٹ سگگ ءَ اَنت۔
ماما قدیر بلوچ ءَ گُشتگ کہ اے مچیانی تہءَ چہ شیرزالیں ماتانی دلیریں بچانی پئیم ءَ لھتیں مردم جتا بنت ءُ یک وشھالیں باندات ءِ ھاترءَ وتی جند ءِ واھشانی دیمھونی دئینت ءُ امل ءِ پِڑءَ ایر کپ اَنت ءُ وتی راج ءِ باندات ءِ سرءَ وتی مرچیگ ءَ ندر کن اَنت۔
ماما قدیر بلوچ ءَ گُشتگ کہ سندھی ءُ بلوچ بیگواھیں مردمانی کھولاں یکجاہ بئیگ ءُ وتی دوستیگیں مردمانی یل کنائینگ ھاترءَ توار چِست کنگ ءُ زھرشانی کنگ لوٹیت۔
آئی ءَ گُشتگ کہ اگں ما یکجاہ زوراکی ءِ ھلاپ توار چِست کنیں گُڑا زیت انساپ رسگءِ واھگ داشت کنیں۔
آئی ءَ گُشتگ کہ اے دمان ءَ بلوچستان ءَ سلتریں استانی زوراکی برجاہ اِنت ءُ ھمک روچی ھساب ءَ مردمانی زورانسری بیگواھی ءِ آماچ کنگ بئیگ ءَ اَنت۔