ہرنائی ءَ پاکستانی پوج ءَ اسکول ءِ ماسٹر زورانسری آوار جتگ

سربوتگیں ھالانی رِد ءَ بلوچستان ءِ دمگ ہرنائی ءَ پاکستانی پوج ءَ یک مردمے زورانسری آوار جنی ءَ پد بیگواہ کُتگ-

آوار جنگ بوتگیں مردم ءِ پجار ماسٹر مجیب الرحمان سمالانی ء عبدالرحمن سمالانی جاھمنند شاھرگ ءِ نام ءَ چہ بوتگ –

اھوالکار ءِ رد ءَ اے مرد گوستگیں شپ ءِ ادار ھشت ءَ پاکستانی پوج ءَ کھوسٹ ءُ شاھرگ ءِ میان ءَ زورانسری آوار جتگ ءُ بیگواہ کتگ –

زانگ بہ بیت بلوچستان ءَ پاکستانی پوج ءِ دست ءَ زورانسری آوار جنی درچ یکشل ءَ برجاہ انت – گوستگیں روچ ءَ پوج ءَ آواران ءَ چہ ھپتاد سالی کماش ءِ آوار جتگ کہ ھنگت بیگواہ انت –

اشی ءَ ابید بیگواھیں مردمانی پانکجنیں گل وائس فار بلوچ مسنگ پرسنز زھرشانی برجاہ انت ءُ مروچی چار ھزار ءُ پنج سد ءُ ششت روچ بنجل ءَ سرجم بوتگ بلے مردمانی یل کنگے بدل ءَ گیشتر مردم آوار جنگ بوھگ ءَ اَنت –