عبدالحمید زھری ءِ یل کنائینگ، چُکانی شُدکُشیں ھڑتال

سندھ ءِ بُنجاھی شھر کراچی پریس کلب ءِ دیم ءَ بلوچ بیگواھیں مردمانی یل کنائینگ ءِ ھاتر ءَ جتگیں بُنجل ءَ عبدالحمید زھری ءِ کھول دو روچی شُدکُشیں ھڑتال ءَ نشتگ اَنت-

ھمے درگت ءَ سعیدہ حمید ءَ گْوشتگ کہ وتی پت ءَ عبدالحمید زھری ءِ پہ سلامتی دراھگ ءِ ھاتر ءَ وتی کھول ءِ ھمراھی ءَ وائس فار بلوچ مسنگ پرسنز ءِ بُنجل ءِ دو روچی شُدکُشیں ھڑتال ءَ نشتگ اَنت-

آئی ءَ گْوشتگ کہ ریاستی ادارھاں چہ دزبندی کتگ کہ آئی ءِ پِت ءَ دیم ءَ بیار اَنت ءُ اگاں آ گناھگار اِنت گُڑا آئی ءَ آمیدگِس ءَ بیار اَنت- سعیدہ ءَ گْوشتگ کہ منی پت ءَ اے وڑ بیگواہ کنگ اے ڈیھ ءِ کانود ءُ آئین ءِ بگیری اِنت-

آئی ءَ ھمے درگت ءَ انسانی ھکانی گلاں گوں دزبندی کتگ کہ منی پت ءِ یل کنائینگ ءَ وتی کرد ءَ پیلو بہ کن اَنت ءُ مئے گمیگیں کھول ءِ وشیاں بدے اَنت-

کھول ءِ نیمگ ءَ مروچی چاگردی رسانکدراں عبدالحمید زھری ءِ یل کنائینگ ءِ ھاتر ءَ #ReleaseAbdulHameedZehri ھیش ٹیگ ءِ ھمراھی ءَ کمپئین برجم دارگ ءَ اَنت- کھول ءَ سرجمیں پڑ ءَ سیادی داروکیں مردماں گوں دزبندی کتگ زھرشانی ءَ بھر بزور اَنت-

بلوچستان ضلع خضدار ءِ تحصیل زھری ءِ نندوک عبدالحمید زھری ءِ کھول ءِ رِد ءَ گوستگیں سال ءِ دہ اپریل ءِ دمگی پولیس ءُ سادھیں گُدانی تہ ءِ کارندھاں کراچی ءَ آئی ءِ لوگ ءَ شپ ءِ بے وھد ءَ بیڑبرتگ ءُ ساڑی ئیں ابدالحمید زھری ء شکر خان وتی ھمراھی ءَ برتگ گوں-

کھول رِد ءَ تاں مروچی آھاں عبدالحمید زھری ءِ سِھت ءُ زند ءِ درگت ءَ ھچ وڑیں سرپدی نیست –