گُلستان: سیزدہ روچ ءَ بندی ءَ پد دو بلوچ یل کنگ بیتگ اَنت

سر بیتگیں ھالانی رد ءَ روکپتی بلوچستان ءَ ھواریں اُستان گُلستان ءِ ھند گالیکشن ءَ ایرانی پوج ءِ دست ءَ گرگ بیتگیں دو بلوچ سیزدہ روچ ءَ بندیگی ءَ پد یل کنگ بیتگ اَنت –

یل بیتگیں مردمانی پجار مھمد رضاء شاھوزئی ء سید اھمد ءُ خلیل شاھوزئی ء عبدالقیوم جھمنند نگین ءِ ناماں زانگ بیتگ اَنت ھردوک گوستگیں روچ ءَ اُستان گلستان ءَ یل کنگ بیتگ اَنت-

ھالانی تہ ءَ گوشگ بیتگ کہ اے ھردوکیں مردم گوستگیں سال ءِ گڈی ماہ ءَ مولانا گورگیج ءِ لوٹگ ءِ بگیری ءَ بیوکیں زھرشانی ءِ وھد ءَ گرگ بیتگ اَنت-

ھالانی تہ ءَ گوشگ بیتگ اے ھردوک دیمزیری ءِ سر ءَ یل کنگ بیتگ اَنت بلے اے پدر نہ بیتگ کہ چنکس مال ءُ ملام ءَ پد یل بیتگ اَنت-

اھوالانی تہ ءَ گوشگ بیتگ مولانا گورگیج ءِ یکگور کنگ ءِ پژدر ءَ اُستان گلستان ءِ مھلوک برانز گپتگ ءُ آیاں زھرشانی کرتگ ءُ چریشی ءِ پژدر ءَ زھرشانی کنوکانی سر ءَ ایرانی لشکر ءَ تیرگواری ھم کرتگ اَت ءُ بازینینے دزگیر ھم کرتگ اَت-

ھالانی تہ ءَ اے ھم گوشگ بیتگ ایرانی سرکار ءِ مُلایانی آمیدگس ءَ اے ماہ ءَ بازیں ملایے آمیدگس ءَ پیش بیگ ءِ لوٹ کرتگ اَنت کہ تنی وھدی ھشت کس اے رد ءَ برگ بیتگ اَنت-